Tempo ta duna e prueba ocho aña despues di su despedida di Aruba
*Su exigencia tabata pa nunca porta cera pa necesidad di un Arubiano
*E vehiculo pa uni Aruba awe mester lucha den un mundo sin compas
ORANJESTAD (AAN) — Ayera tabata ocho aña pasa cu e estadia di Jossy Mehsen Mansur na mundo a yega na su fin.
Un Arubiano, cu a entrega su mes na e causa di su pais, a despedi di e campo di bataya den cual el a lucha pa nacemento y bienestar total di su pais natal, Aruba.
Ora skirbi of bisa cu Jossy Mehsen Mansur tabata un Arubiano, mester bay mas leu cu e registro di poblacion cu ta entrega e base pa un hende bisa cu ley ta duna su persona e derecho di bisa cu e ta un Arubiano.
DIARIO a wordo introduci dor di Jossy Mansur como arma pa realisacion di e Status Aparte di Aruba pero den e sentido mas profundo di e nificacion di e palabra aki.
DIARIO mester a demanda respet pa Aruba y e Arubiano den tur sentido, cuminsando cu e calidad di medio di comunicacion cu DIARIO lo mester tabata na nivel mundial.
Papiamento, segun reglanan directo di e ortografia cu Aruba a dicidi cu ta di Papiamento di Aruba, mester ta e idioma cu cual Pueblo di Aruba ta comunica den sentido mas amplio di e nificacion di e palabra “comunica”.
DIARIO no tabata solamente un medio pa bisa cu Aruba tin un medio di comunication skirbi, pero pa e Arubiano tin comunica riba tur tema cu otro cu palabranan Arubano, a base di mentalidad y costumber Arubano, y sin ningun miedo cu cualkier instancia den exterior, por exigi pa bay contra e interes di Aruba den DIARIO.
Tur celebracion di Aruba tabata haya espacio den DIARIO pero tambe tur dolor di Pueblo pa no papia mes di e lucha nacional pa Aruba logra su Status Aparte.
Dolor di e Arubiano mester a wordo alivia ora e bandona DIARIO y personal mester respeta e Arubiano como Arubiano, su necesidad, su folkore, su costumber, su problemanan cu mester haya solucion.
Ora papia di Jossy Mehsen Mansur, no ta papia di un empresario realmente. Escritor di e columna aki a dirigi cantidad di corant di Antia prome cu el wordo acerca dor di Jossy Mansur pa dirigi DIARIO. E aspecto cu mas a resalta ta, cu Jossy Mansur a mustra cu den DIARIO no ta acepta aviso paga di companianan pafor di Aruba, pa asina aviso for di exterior no bira un occasion pa exigi cualkier articulo contra bienestar di Aruba.
Jossy Mehsen Mansur tabata Jossy pa tur hende. E tabata tin atencion pa tur hende. Jossy su bida tabata hende te na un grado cu ta dificil splica den un mundo material, manera nos mundo actual.
Ningun persona cu a drenta DIARIO cu un problema, tabata bandona e edificio cu e problema. Ningun noticia cu a wordo entrega na DIARIO por a wordo cualifica como algo cu no ta importante.
DIARIO a nace como miembro di un comunidad, cu tur miembro di personal mester a sirbi. Punto!
Problemanan cu tabata wordo presenta na DIARIO dor di Arubianonan a evita desaster pa Aruba.
DIARIO a desaroya como cas di e Arubiano cu mester di atencion urgente, na cualkier momento di dia y personal di DIARIO no tabata simplemente buscador y presentador di noticia, pero e vehiculo pa yuda yega na solucion.
Ayera a cumpli ocho aña cu e visionario Jossy Mansur a despedi di e mundo aki. Naci como vehiculo di comunicacion pa un Status Aparte berdadero di Aruba, DIARIO mester sigui cumpli cu e deber enfrente Aruba y e Arubiano cu a culmina sigur durante e prome 24 aña di Siglo 21.
Recesion mundial cu a amaneza henter mundo, fayonan continuo pa tene na refineria como base economico di Aruba, salida y entrada di dictadornan nobo na mundo, cambio di mentalidad, cambio di mundo.
Ocho aña despues di e momento cu Jossy Mansur a despedi pa semper di Aruba, mester mira atras riba loke hamas por a premira manera e Pandemia di Covid-19, den cual comunicacion debido na Aruba a bira prome necesidad pa scapa hende.
E hecho cu Aruba tin DIARIO cu ta comunic a base di tur loke ta netamente Arubano, a percura pa por a actua ora Covid-19 a bati na porta; ora prijs di petroleo a amaneza cu recesion na 2023 y awor cu clima mes ta cambia.
Na 2024 nos ta recorda Jossy Mansur como visionario cu a percura pa enfrente uno di e temporadanan mas dificil den su historia, Aruba tin DIARIO pa comunica a base di e sistema mas efectivo pa comunica na Papiamento di Aruba, na forma cu Arubiano ta prefera y na defensa di Aruba.
Jossy Mehsen Mansur nunca a muri realmente. E ta sigui biba den loke el a laga atras y sigur den e respet, admiracion y calor humano cu cual nos tur ta recorda uno di e Arubianonan cu a entrega su mes na su pais!
