Thomas Ruiz, Secretario di VRA:
“Seguridad den trafico no ta den man di un persona pero den man di nos tur”
ORANJESTAD (AAN) – Den entrevista cu DIARIO, e Secretario di Verening Rijscholen Aruba (VRA), señor Thomas Ruiz, cu tin diferente factor cu ta contribui na e cantidad di accidentenan cu ta sosode na Aruba. Un ehemplo ta, esnan cu tin rijbewijs bieu unda cu e examen ta di un calidad inferior y no a duna resultado manera mester ta.
Tambe tin otro factor cual ta cu hopi hende ta core sin rijbewijs. Nan no tin conocemento di e leynan vigente. Otro motibo ta cu tin stranheronan cu ta bin Aruba y ta cambia nan rijbewijs a base di tratado. Ruiz a bisa cu nan tin derecho di cambi’e berdad, pero e ta sugeri nan pa bay un curso pa nan ta al tanto di e leynan vigente.
“Pasobra por ta e leynan den nan pais no ta mescos cu akinan, y nos tin otro cultura di maneha na Aruba”, Thomas Ruiz a subraya.
El a menciona otro factor cu ta esnan cu tin rijbewijs di e sistema nobo. “E problema cu nos tin cu e sistema nobo ta cu te awe Departamento di Examen Bureau no por duna nos cifra, of un informacion kico ta e impacto di e sistema nobo cu nos ta bezig di 4 pa 5 aña cune. Y tambe, manera nos a bisa den prensa, nos a kita e sosten pa cu credibilidad di examen, door cu tin hopi factor cu nos no por sostene mas e credibilidad di examen y e integridad di examen”, Thomas Ruiz, secretario di VRA a señala.
El a agrega cu ta keda na e departamento di Examen Bureau pa bin dilanti y duna pueblo splicacion di por ehemplo, cu nan tin un porcentahe di slaag di 29%, anto di con? Duna pueblo un splicacion, di un manera of otro, kico ta e impacto di e cambionan haci door di e sistema nobo. “Pero ya, un silencio total, hermetico, manera boso tur sa nos tin casi un aña ta bati na porta pa nos por haya oido y atencion, pa e preocupacion cu nos tin pa e problematica cu ta regarda trafico”, Thomas a remarca indicando cu portanan ta cera pa duna VRA oido. Pesey nan a tuma iniciativa tambe, por ehemplo duna boet tambe. P’esey, conhuntamente cu su amigo y mentor, a cuminza drenta den pueblo den forma di charla, bay di bario pa bario educa y informa, y tambe haya informacion di pueblo, tocante e trafico den cada bario. Cada bario tin problema cu trafico, Thomas Ruiz a señala. “Tambe nos ta purba concientiza comunidad cu trafico sigur no ta keda den man di un persona, sino di nos tur!”
