MERIDA: Un situacion di emergencia a presenta su mes na Merida na Venezuela,
ora cu un turista Canades a ser treci sin señal vital na Servicio di Emergencia di Instituto Autonomo Hospital Universitario de los Andes. Docternan no por a scapa su bida mas. Pero pa tin claridad kico a ocasiona su morto, autoridadnan a ordena pa practica autopsia riba e restonan mortal.
Resultado di e autopsia ta cu e turista Daniel Michael Holt di 42 aña di edad, a fayece di un hipoxia pulmonar, cu ta encera cu diripiente e no por a hala suficiente rosea. Ora cu esaki a socede, e tabata haciendo uso di e Sistema di Teleferico di Merida. E tabata e ora ey na e Estacion Loma Redonda, cu ta un di e 6 stacionnan di e Sistema Teleferico di Merida.
E stacion aki ta na un haltura di 4.045 meter riba nivel di lama, y ta forma parti di e di tercer paro di e sistema.
Personanan eybanda a mira con e turista a bay suela y su curpa a cuminsa sacudi. Mesora personal di Servicio Medico di Mukumbari a cuminza dune asistencia, despues a opta pa hibe urgentemente pa Hospital.
