Director di Respaldo. Dr. Hendrikus van Gaalen:
ORANJESTAD (AAN): Director di Fundacion Respaldo, Dr. Hendrikus van Gaalen a duna di conoce den cuadro di Dia Mundial di Salud Mental cu no tin salud sin salud mental. El a bisa cu si bo tin un problema cu bo salud fisico, pero bo tin un bon salud mental bo por wanta. Pero si bo no tin un bon salud mental, bo no por want'e, a bisa.
Riba tur nivel y edad ta wak con esaki ta pasa. Tin varios organisacion y fundacion cu ta haciendo nan trabao aki na Aruba cu problemanan hopi compleho, van Gaalen a indica.
Ta ok pa no ta ok. Si bo no ta papia riba dje y si bo ta stimatisa/discrimina otro bo no ta bay ningun luga. E problemanan ta bira mas grandi, a remarca. Mester stop di stigmatisa otro, discrimina otro. Esey ta yuda hopi bon pa salud mental.
E director di Respaldo a menciona cu door di Covid, a haya basta problema di salud fisico, pero tambe a bin acerca mas pobresa y problemanan social. No mester lubida cu e problemanan social ta un causa importante pa haya malesanan y problemanan mental grandi. "Nos tur ta responsabel con nos ta pone Aruba riba su pianan", a expresa.
El a bisa cu stigmatisacion kiermen cu no ta inclui hende pero den comunidad mester inclui tur hende. Sea cu bo tin problema mental of no, problema social. "Si nos ta exclui hende, si nos ta stigmatisa hende e ora ey bo ta haya un grupo di hende cu ta haya problema mental pasobra bo ta exclui nan di bo comunidad".
Segun van Haalen, mester ta consciente di kico ta pasando y riba con mester stop stigmatisacion pa inclui tur hende den comunidad.
El a agrega cu 41% den comunidad ta haya un problema mental grandi den bida. Si ta discrimina otro hende, por ta den futuro abo ta haya problema. E no ta kere cu e porcentahenan ta bay mira menos. Locual si por cambia ta cu ta bay profesionalisa mas y ta traha bon hunto compara cu antes.
