Cambio di clima ta mustra bon cla...
ORANJESTAD (AAN): Temporada di Horcan a start oficialmente Diaranson siman pasa, y ya caba por a nota siman pasa con dos sistema a manera haya forma, y finalmente uno di nan a pasa riba Florida y awor riba Oceano Atlantico a bira un Tormenta Tropical.
E temporada di Horcan pa Oceano Pacifico ta core for di 1 Juni 2022 te cu 30 November 2022. Na opinion di Rino Hermans, kende ta Director di Departamento di Calamidad y basando su mes riba pronostico di expertonan di National Hurricane Center, e aña 2022 lo bay bira e aña #7 den Atlantico cu ta bay conoce un promedio di tormenta mas hopi cu normal tabata conoce den Atlantico y Caribe.
E pronostico ta cu den 2022, un total di 22 sistema tropical lo bay haya ‘nomber’, di cual 6 ta wordo mira di lo bira un Horcan grandi. Cu e ‘Horcan grandi’ aki bo por imaginabo algo igual cu un Horcan Irma cu a azota St. Maarten na 2017.
“E ta bay bira un temporada hopi activo atrobe pa region Atlantico y Caribe,” Hermans di Bureau BRA a indica. “E ultimo aña nos tabatin suerte cu hopi di nan a keda pafo di region di Caribe cu no a dal e islanan aki, pasobra corda cu nos ta saliendo di un Pandemia y di e Crisis Economico, y cu e golpinan aki riba dje di infrastructura, e islanan di Caribe pa nan por bons bin bek, ta bay haci esey mas dificil.”
Pero e ta pone un obligacion na pueblonan den Caribe, pa prepara nan mes pa por recupera aun mas rapido, pasobra ta un pilar economico e isla tin, esta ‘turismo’, y ningun turista lo bin Aruba si acaso e infrastructura no ta na ordo.
“Aworaki no ta Gobierno su responsabilidad so, sino e responsabilidad di henter un pueblo pa por bons y bin bek for di cualkier eventualidad cu por afecta nos den e lunanan nos dilanti,” Hermans a bisa.
E hecho cu esaki ta di siete aña cu tin pronostico asina halto pa cantidad di Tormenta y Horcan, ta ponebo ripara cu e cambio climatico mundial ta haciendo un efecto asina. Pasobra no ta normal bo ta haya asina hopi temporada tras di otro cu asina hopi pronostico. Semper tabatin e efecto di ‘El Niño’ y ‘La Niña’. Pero awor segun Hermans, no tin diferencia mas entre ‘El Niño’ y ‘La Niña’.
Dos aña pasa un total di 28 sistema a nace y menaza e region. Awor na 2022, e pronostico ta cu lo por bay mira 22 sistema cu lo bay nace. Pues no sa exactamente kico lo bin, pero pueblo tin di djis prepara, inverti den proteccion, y sigui tur boletin di cerca via prensa.
Bureau Rampenbestrijding Aruba ta vigila tur dia e desaroyonan riba Oceano Atlantico y Caribe, for di 1 di Juni te cu 30 di November. Ta tur dia nan ta haya update den colaboracion cu Departamento Meteorologico Aruba.
BRA tin 4 dia ta informa pueblo conforme e plan, y na momento cu tin un sistema di tempo cu ta cuminza bay bira un menaza, e Departamento mesora lo cuminza duna alerta posiblemente mas cu 96 ora di antemano.
Mientras cu otro paisnan ta pensa cu 96 ora ta mas cu suficiente tempo pa prepara pa un Horcan, na opinion di Hermans, e sa cu Aruba mester di por lo menos 2 siman completo pa por bay prepara.
El a menciona por ehemplo, cu na Aruba no tin suficiente plywood pa tapa tur bentana na cas. Y si bo no a tapa bentana, e chens ta grandi cu bo ta bay perde e dak di cas. Pues tin hopi factor cu tin di tene cuenta cune, compara cu paisnan grandi.
Pafor di e faha di Horcan? Semper hendenan ta bisa cu Aruba ta safe, como cu e isla aki ta ‘pafo di e faha di Horcan’. Pero esey ta valido ainda? Djis mira e dianan aki, con duro biento ta azotando e isla aki. Algo cu hamas antes bo tabata mira asina hopi socede. Antes biento fuerte ta wordo asocia solamente durante temporada di Cuaresma, pero awor ta hopi luna caba e ta andando.
“Si antes nan tabata bisa cu Aruba ta pafo di e Hurricane-Belt, nos mester kita for di e mito ey,” Hermans a declara. Si antes calculacion ta bisa cu mas cu nos por haya ta Categoria 1, realidad ta cu awor Aruba tin di prepara su mes pa ricibi uno di Categoria 2 of hasta Categoria 3.
Rino Hermans a splica aki, cu e cambio climatico ta influenciando na momento inoportuno. Por ehemplo riba 1 di Januari bo ta sinti asina hopi calor, cu normal Aruba lo a sinti na luna di September. Pues tur hende tin di monitor e cambionan aki cu ta influenciando e sistema di tempo den Caribe.
