Na inicio di e parti final di 2022 realidad ta yabi pa drenta futuro --- *Mester scrap sistema politico como trampolin pa logro personal --- *Gremionan mester uni den un banco di informacion corecto y honesto
ORANJESTAD (AAN) — E prome mitar di 2022 cu mester a habri un caminda nobo pa recuperacion mundial, a pasa pa historia.
E temporada cu mester a hiba Aruba y mundo na pasashi pa un futuro a base di un maneho dirigi, mundialmente a bira un soño cu a rementa den cara di mundo.
Awor cu e prome seis lunanan di 2022 a pasa pa historia, sobrevivencia di paisnan democratico manera Aruba, ta exigi di tur participante na e sistema politico y di tur gremio, pa asumi responsabilidad pa bienestar di Aruba na prome lugar y stop di uza sistema politico pa cumpra voto pa un dia por gana eleccion.
E ponencia aki sigur mester wordo presenta na mundo politico, na tur partido mescos cu na tur gremio, cu no por uza Aruba pa nan beneficio pero tin e deber pa restora e autenticidad di politica, cu ta sirbishi di bienestar di e pais.
Ya no tin tempo pa weganan politico tradicional den cual politiconan ta practica formulanan pa gana curason di un pueblo, cu mester biba cu un realidad cu cada dia ta pinta su mes cu mas forsa na panorama mundial, cu ta entrega mundo e ehempel di desaster total.
Honestidad mester ta marca di liderazgo di Aruba, cu mester cu henter mundo ta bay drenta un epoca desastroso, cu ta confirma e final di un soño pa recuperacion na 2023, cu mas bien lo trece un pakete cu ta exigi liderazgo firme pa un Pueblo bon informa, por crea su futuro cu lo no ta basa riba loke a wordo planea.
2022 no a desaroya manera a wordo spera ora ya el a habri cu un pakete sumamente peligroso pa mundo atende.
Central den e maleta di 2022 tabata tin e transicion di petroleo cu cantidad di palabracion mara na cambio di clima, cu ya tin efectonan sumamente serio pa bienestar di paisnan y di hende.
E desaroyonan den mundo petrolero, ta crea un escenario caotico, marca pa mucho mas cu generalmente un aspecto economico ta crea.
Si na 2022 hende mester a cuminsa traha riba salida di e era di petroleo, petroleo a bira e centro di un guera mundial nobo den cual Rusia ta hunga un papel central como productor mayoritario di petroleo y gas.
Ya no ta papia di salida di e era di petroleo pa motibo di clima, pero ta papia di petroleo como un poder mundial, cu ta dicidi riba relacionnan entre paisnan den e confrontacion Rusia y mundo liber.
E desaroyonan di 2022 a hinca mundo den un caos, cu ta bay mucho mas leu cu e inflacion cu a haci bida impagabel pa mundo y por afecta na forma sumamente serio e calidad di bida na tur pais di mundo.
Kico lo pasa den e ultimo lunanan di 2022 y 2023 lo nifica e final di e mundo cu a wordo planifica pa supera e problemanan cu Covid-19 a genera?
Honestidad y informacion corecto awe ta base pa lidernan den tur sector di Aruba, cu mester wordo prepara pa un tempo sumamente dificil y cu ni sikiera ta duna certeza di loke e lo contene ni pa Aruba ni pa mundo.
Mester spera cambionan serio den nos situacion regional. Mester spera cambionan den cooperacion cu Reino, den cual formulanan firme ta permiti, pa Aruba habri porta pa e temporada mas dificil cu e pais a conoce for di Segundo Guera Mundial.
Ora tuma nota di loke ta costumber y tradicion di politica na Aruba, mester conclui cu e prome exigencia di e segundo parti di 2022 ta, cu politica barata pa cumpra curason y voto, mester pasa pa historia.
Aruba mester di sinceridad pa Aruba por uni den e causa comun, di crea un plan den cual lidernan sincero, ta guia un comunidad den uno di e momentonan mas dificil cu historia mundial moderno a conoce.
