ORANJESTAD (AAN): Varios consumidor local a keda babuca pa mira con e cargamentonan nobo cu a yega Diamars siman pasa via containers,
a bin cu invoice cu ta mucho mas halto compara cu esnan anterior. Pesey desde Diaranson y Diahuebs caba, varios hende a keda cu shock pa mira con e prijs pa kilo di 'chicken breast', y tambe prijs pa kilo pa 'chicken wings', y pia di galiña a subi.
Desde cu e Pandemia a cuminza na Maart 2020, a presenta problema cu e sistema di distribucion di alimento rond mundo. Diferente factor a plama den otro, cu a pone cu dado momento tabatin un scarcedad enorme di hala di galiña (‘chickenwings’) rond mundo. Esey debi cu hopi trahador di plantanan cu ta procesa y empaketa galiña a bira malo di Covid, y pa colmo despues no por haya suficiente container refrigera pa por transporta nan.
Prijs ta sigui subi: For di e tempo ey, e scarcedad a pone cu prijs pa galiña a cuminza subi. Na Aruba tambe, clientenan y principalmente managernan di Restaurantnan a cuminza mira con prijs pa kilo di pecho di galiña (‘chicken breast’) ta sigui subi.
Wholesalernan local ta ricibi hopi zundra di negoshinan local, pero e importador tin di djis mustra nan e invoice di shipping pa mesora bo mira cu tur cos a subi.
Y awor na 2022 ta pio aun. Ademas cu prijs di galiña a subi, ta bin acerca e costo extra di bunkering, prijs di combustible cu barconan ta usa pa trece containers, y tur e servicionan cu ta costa aun mas, debi na aumento di prijs di petroleo.
Prijs di galiña a subi tur caminda, incluyendo Brasil cu ta un productor grandi. Na Inglatera esaki tambe tin impacto grandi, como cu galiña ta e cuminda cu mayoria di hendenan gusta come na Gran Bretaña.
Restaurantnan na Aruba ta cumpra chicken breast den caha cu ya caba ta riba di 100 Florin. Den fin di siman mes un conocido operador di restaurant a expresa cu e tin e sentimento cu prijs pa un caha di 'chicken breast' lo por pasa 130 Florin entrante e siman aki mes. No spanta si acaso e prijs yega 150 Florin pa caha.
Den tiendanan rond di Aruba, e prijs ta varia tambe bastante. Algun caminda e prijs pa 13,99 Florin pa kilo nay ariba pa chicken breast, y otronan unda e prijs ta poni ainda na 11,50 Florin pa kilo.
Pesey ultimo tempo na Aruba, tin hopi hende cu ta core cumpra galiña na nan Supermarket riba Dialuna y Diamars, pasobra e chens ta grandi cu riba Diaranson of Diahuebs, e prijs lo subi cu e cargamento nobo cu a drenta.
Algun medida tuma pa esaki: Algun pais a cuminza impone medida pa evita cu prijs di galiña ta sigui subi. Na Peru, a elimina Tax riba e.o. galiña cu webo. Pero ni e ley nobo aki no a yuda pa mantene prijs di galiña abao.
Dos siman pasa na e pais di Malaysia, e prome ministro Ismail Yaakob a dicidi na prohibi exportacion di galiña. Esaki a ser haci pa asina evita cu tin scarcedad di galiña na nan mesun pais, y asina trata na controla e prijs cu ta subiendo sin piedad. Esey nifica e 3.6 miyon galiña cu nan tabata exporta cada luna a stop. Y esnan cu mas ta sinti esaki ta ciudadanonan di Singapore, cu ta haya 1/3 di su galiñanan for di Malaysia. Awor Singapore ta haye obliga di busca galiña di otro lugar.
Na Londres, e doño di un cadena grandi di Supermarket a hasta adverti, cu galiña lo por bira mes caro cu carni di baca. E prijs pa kilo ta sigui subi tambe eynan cada siman, demostrando cu keto bay tin hopi demanda pa galiña.
