Tin desaroyonan positivo na Oranjestad y algun inversion cuantioso tumando lugar

Minister Geoffrey Wever:

ORANJESTAD (AAN) – Minister Geoffrey Wever, titular di Economia, Comunicacion y Desaroyo Sostenible, a indica den entrevista cu DIARIO, cu e ta den comunicacion cu diferente doño  di establecimento situa den ciudad, cu ta pa huur of pa bende.

El a caba di pasa na Wilhelminastraat y a mira un par di edificio den renovacion, pues toch por wak cu tin animo. Gobierno mes a keda cla den e siman aki na Wilhelminastraat cu e prome fase di Cas Veneranda, pa sigui awo cu e di dos fase.

“E ta algo hopi bunita di wak cu nos a restaura un monumento asina bunita den Oranjestad, e ta bira e Departamento di Asuntonan Economico y un restaurant. Mi ta kere cu esey ta bay ta iconic pa Oranjestad. Nos bezig cu e edificio di Ministerio Publico, pa converti esaki den diferente flat, e palabracion ta bayendo bon, y asina nos ta combersacion cu diferente otro comerciante, unda cu nos ta wak cu nan ta invirtiendo. Nos ta buscando pa wak con nos por mehora e area pa nan”, e dignatario a señala.

Wever a menciona cu tin tres block cu ta den desaroyo, y gobierno ta siguiendo esaki di cerca pa duna nan input, y yudanza na unda nan por, pa drecha e area p’asina e construccion y renovacion pa e comerciantenan pas cu locual nan a haci na Wilhelminastraat unda a purba ofrece algo cu ta pas cu e restaurantnan cu tin eynan.

El a menciona cu esey nan kier haci cu otro tres area cu a identifica unda ta bay tin desaroyonan hopi positivo, pero e area rond ta den mal estado.

“Nos ta papiando cu nan pa nan haci nan inversionnan, anto nos ta percura pa e parti rond, pa nos tin un plan cu ta mas coherente. Pero bo tin un par di block cu ta renova”, e mandatario a reitera.

E mandatario a remarca cu gobierno ta den contacto cu doñonan di edificio, pero esakinan ta propiedad priva. Nan por stimula y ta den contacto pero no por obliga ningun hende pa pone nan edificio pa bende. No obstante e mandatario ta contacto di mira cu tin desaroyo y cu inversionnan basta cuantioso ta tumando lugar na Oranjestad.