Tin datonan cu ta tuma mas tempo pa analiza pa CBS por duna mas resultado di e encuesta di Labor 2023

Yvonne Lee-Perez ta splica:

ORANJESTAD (AAN) –Yvonne Lee-Perez, di Departamento di Labor y Investigacion, tambe a hiba palabra den conferencia di prensa, relaciona cu e resultadonan di e encuesta di labor 2023, cu CBS hunto cu Departamento di Labor a realiza.

Señora Lee-Perez a bisa cu e resultadonan duna den e conferencia di prensa aki, ta e prome resultadonan. Tin hopi mas resultado cu por saca di e data cu CBS a colecta, y manera a wordo indica, e cantidad di trahadornan a subi, pero mester wak den cual sector a aumenta, y esey ta tuma un tiki mas tempo, pasobra nan ta uza “coderen” internacional pa duna tur empresa riba mercado un code, pa asina nan por agrupa nan den diferente sector, y por bisa den cual sector e cantidad di hendenan cu ta trahando a subi.

E datonan aki ta bin despues, pasobra esey ta tuma un tiki mas tempo, señora Lee-Perez a reitera.

El a añadi cu un indicador cu tambe ta capta hopi atencion ta e cifra di desempleo bao di hubentud, cu nan ta bay analiza mas cu mas profundidad, e no tey ainda pero si por a mira den e prome datonan, cu e populacion di e hobennan no a bira hopi mas grandi. Pero si ta mira cu un grupo cu ta inactivo den 2022, a bay over na traha, y un grupo ta rondea trabao. Esey ta haci cu aña pasa CBS a midie na 9.9% y na 2023 a bira 11.1%.

“Pero bo ta mira toch un bon flow cu tabata inactivo, por ta nan no a caba scol, of no tabata busca trabao, y toch nan ta den e grupo pa bira economicamente activo. Esaki ta e parti cu nos por a haya via arbeid”, señora Lee-Perez a splica.

El a comenta cu hopi biaha tin e pregunta cu tin 33.000 hendenan inactivo. “Si, pero nan ta e grupo di hendenan grandi, tambe tin aden e muchanan cu ta bay scol, y ta keda un parti cu ta e hendenan cu ta scoge cu no kier traha aworaki, y por tin diferente motibo. Nan tin zorgplicht cu nan no ta bezig ta buscando pa subi mercado, y ora nan ta busca trabao nan ta cumpli cu e criterionan pa ta un trahado. Pero na momento cu nan no ta cumpli cu e criterionan nan ta inactivo” señora Yvonne Lee-Lopez a indica.