ORANJESTAD(AAN): Durante un conferencia di prensa Dialuna mainta, Prome Minister Evelyn Wever Croes a papia tocante e proceso di Condecoracion Real pa 2025.
E mandatario a indica cu recientemente durante un bunita evento, 18 persona di nos comunidad a ricibi un Condecoracion Real, pasobra nan a destaca riba diferente tereno.
“Diez ocho ciudadano di nos pais cu a destaca a haya e condecoracion aki for di man di Gobernador”.
Mi kier anuncia cu pa e siguiente Condecoracion Real pa 2025, e oportunidad ta cuminza awe, segun Wever Croes.
El a sigui bisa cu e comision encarga cu e Condecoracion Real aki na Aruba a informa cu entrante Dialuna 6 di Mei pueblo di Aruba por cuminza entrega e proposicionnan pa Condecoracion Real di 2025.
Segun e Prome Minister, pa un persona por wordo considera pa por haya un Condecoracion Real, tin algun rekisito cu mester tene cuenta cune.
“E acento ta en particular riba e prestacionnan den comunidad y pa comunidad”.
Tin dos categoria, di cual e prome ta trabao boluntario cu e persona ta haci.
Esaki ta nifica trabaonan pa cual e no ta ricibi un salario of pago, segun e mandatario.
El a sigui bisa cu e persona mester a haci e trabaonan aki pa por lo menos 15 aña, pa bin na remarke pa ricibi un Condecoracion Real.
E otro categoria ta pa prestacionnan particular cu un persona por a haci den su trabao, pero mester ta prestacionnan hopi particular.
“Tanto e prestacionnan di e prome categoria como tambe di e di dos categoria mester ta di un caliber y un nivel hopi halto, cu ta surpasa locual cu normalmente ta wordo spera di su trabao y e mester tin tambe un balor excepcional pa e desaroyo di Aruba.
Pesey mi kier invita henter comunidad pa ban duna honor na esun cu merece honor, pasobra na Aruba tin hopi hende cu ta haci trabao boluntario y ta importante pa duna honor na esun cu merece honor, segun e Prome mandatario.
E ultimo dia pa entrega e proposicion pa personanan haya e Condecoracion Real ta dia 31 di Juli di 2024.
