Variante Delta causando un ola di casonan
ORANJESTAD (AAN): E proximo ola di Covid-19 ta inevitabel. E variante Delta ta percurando pa e virus plama mas lihe rond mundo y Aruba no ta e excepcion.
Segun cifranan di diadomingo, Aruba a alcansa un total di 210 caso activo na e momentonan aki (112 residente y 98 no-residente).
E casonan nobo tabata 28 (19 residente y 9 no-residente). Mientrastanto, 2 persona a recupera.
No a reporta ningun fayecimento relata na Covid-19 durante weekend.
Na Hospital, no tin datonan, actualisa pa loke ta e situacion den fin di siman. Pero mester corda cu diabierna tabata tin 9 persona interna di cual 4 tabata den ICU, 4 riba piso general y 1 riba piso di pediatria (mucha).
Segun Hospital, mayoria di pashent cu Covid-19 cu a wordo interna for di 1 di Mei, un cantidad masha tiki mes (2 so) tabata completamente vacuna mientras cu e resto (55) no tabata tin ningun vacuna of solamente a haya un dosis di e vacuna.
