Lenny Geervliet, coordinador di proyecto 125:
ORANJESTAD (AAN) – Lenny Geervliet, Coordinadora di Proyecto Telefon 125, den entrevista cu DIARIO a declara, cu durante henter October por celebra e Luna Internacional di Adulto Mayor, aunke e fecha oficial tabata 1 di October.
“E adulto mayor ta den ‘spotlight’ durante henter e luna aki, y ta importante pa concientiza riba e posicion y e situacion cu e adulto mayor na Aruba, ta haya su mes den dje”, señora Geervliet a expresa.
El a agrega cu esaki ta varia hopi. E yamadanan cu ta drenta 125 ta hopi, y tin cu ta di alegria, pa comparti un storia, algo bon cu a pasa, algo cu nan a pensa, of un preocupacion.
“Y bo ta ripara den e combersacionnan cu e ambiente cu nos adultonan mayor ta aden, no tur ora ta uno di gaba”, Geervliet a indica. Tin adultonan mayor cu ta keda traha te edad halto, no solamente pasobra nan gusta traha, pero tin biaha pasobra nan no por biba cu e entrada cu nan ta haya di pensioen.
“No ta por nada cu nos ta bisa tur ora ‘concientiza na jong riba con abo lo kier bira grandi, con bo kier pa bo situacion ta e ora ey, kico ta e necesidadnan cu bo mester cumpli cu nan, pa ora bo ta adulto mayor bo por tin un bida cu bo tin derecho riba dje”, señora Lenny Geervliet a menciona.
E grupo di adulto mayor ta creciendo, y pa 2030, 28% de nos hendenan, cual ta mas cu un di cinco parti di nos comunidad, lo ta adulto mayor, y tin un grupo chikito cu mester carga e gastonan na dado momento pa por cumpli cu e pago di pensioen. “Nos tur sa esey. Nos sa y a experiencia hopi cos, y awo ta bin e pregunta: ‘Con nos ta bay sigui? Con nos ta bay hiba un maneho cu ta crea oportunidad y posibilidad di camindanan pa cana, pa esnan den edad ci 40, 50 bay prepara pa ora nan yega 60, 70, 80 aña? Esnan cu tin awo den edad di 70 pa 80, esta adultonan mayor, no tur ora tin un bida cu bo ta bisa ‘esey mi kier logra pa mi mes’. Mi ta haya cu Aruba su standard di bida manera mester ta, no t’asina ainda”, Lenny Geervliet a señala.
El a agrega cu ta importante pa bisa un biaha mas cu 125 ta un punto di sosten pa adulto mayor, y ta pidi pa por fabor yama nan, comparti bo situacion y ban wak hunto si por mehora bo situacion.
“No solamente social, cu bo ta haya bo bo so, pero tambe ora tin cosnan cu bo kier soluciona y bo no ta logr’e. Problemanan y tur cos bo por comparti cu nos, y nos no ta duna ni un paso si abo, como adulto mayor, no ta desea esey”, señora Lenny Geervliet a señala.
