Minister Ursell Arends:
ORANJESTAD (AAN): Dia 24 di september 2024 Conseho di Minister a aproba un proposicion pa un ley di Corporate Governance, y tambe un Corporate Governance Code. E ley di Corporate Governance lo obliga ministernan pa raporta decisionnan cu nan kier tuma relaciona cu companianan estatal y otro instancianan den sector semi-publico.
Por ehempel, ora un minister kier nombra of retira un comisario of miembro di directiva, ora di determina con lo anda cu dividendo di un compania estatal, of ora di cumpra of bende accionnan di un compania.
Minister Arends a tuma encargo di proyectonan di Corporate Governance na 2021, cu continuacion di e trabounan di Commissie Corporate Governance. Despues a percura pa sigui desaroya e leynan di Corporate Governance, haya aprobacion pa esaki den Conseho di Minister. Tambe a instala un Implementatieteam Corporate Governance cu activamente ta preparando e implementacion di e leynan di Corporate Governance.
E ley di Corporate Governance lo haci e proceso di ora un minister tuma decisionnan corporativo hopi mas transparente. Esaki por medio di un Corporate Governance Authority, na unda e ministernan lo mester raporta di antemano (prome cu tuma un decision). E Autoridad lo conseha e minister riba e decision, y lo publica e informacion riba su website pa tur hende por ta altanto.
Den e caso cu e Autoridad tin obhecionnan serio contra un decision cu un minister kier tuma, y e minister insisti, un proceso alternativo ta inicia, na un forma transparente, cu mas argumentacion y conseho, y un rol pa Parlamento.
Cu e ley di Corporate Governance Aruba por spera miho decisionnan di Gobierno relata na sector (semi-)publico, miho nombracionnan y mas transparencia. E miho nombracionnan y decisionnan na nan turno lo resulta den miho maneho di nos companianan estatal.
Adicionalmente, implementacion di e Corporate Governance Code lo aumenta e nivel di Corporate Governance den e sector (semi-)publico, incluyendo fundacionnan cu ta ricibi subsidionan. Ora ta trata di placa di pueblo, ta keda importante pa percura cu e placa ta wordo uza na un forma eficiente y responsabel. Reglanan di Corporate Governance tin un rol crucial den esaki.
E Corporate Governance Authority no lo solamente conseha ministernan y percura pa transparencia. E Autoridad tambe lo asisiti e sector (semi-)publico pa por cumpli cu reglanan di corporate governance, y lo facilita mas conocemento y profesionalismo na Aruba relata na Corporate Governance. Di e forma aki, lo aumenta Aruba su nivel di Corporate Governance na un forma structural.
