‘Un celebracion di sabor durante e weekend di 12 y 13 di october’
ORANJESTAD (AAN): Durante comienso di e siman aki, Autentico Aruba Culinary festival a inicia cu un tremendo Restaurant Week, caminda diferente restaurant participante ta ofrece un menu special den anticipacion pa e Wilhelmina Pavilion durante e weekend di 12 y 13 di oktober. Un weekend cu ta priminti di ta uno magico, unda cu lo celebra y comparti e mundo culinario cu localnan y huespednan di nos isla,
Autentico Aruba Culinary Festival, ta un evento culinario cu ta uni recetanan di varios pais. Aruba, como un pais cu un historia unico, cu ta resulta di un comunidad cu mas di 100 nacionalidad conviviendo hunto, treciendo diversidad y rikesa den nos tradicion culinario.
Autentico ta significa algo diferente pa cada un di nos. Receta nan di varios pais, cu tambe ta forma parti di e experiencia culinario, y tin biaha cu a haya nan toke Arubiano, esey ta un gran parti di Aruba su storia. Talento nan local cu ta combina receta tradicional cu tecnica nan nobo, creando un era nobo pa Aruba su cushina.
Tur esaki lo por wordo presencia durante e weekend espectacular di 12 y 13 di october. Lo transforma e cayanan den Wilhelminastraat pa presenta e Pavilion cu lo conta cu participacion di hopi restaurant.
Riba diasabra, 12 di october, lo por experiencia e di seis edicion di locual ta bira e Bartenders’ Brawl, caminda cu e mihor mixologistanan di Aruba lo competi riba e main stage. Mesclando asina cocktails creativo cu ta resalta e sabornan unico di nos isla.
E competencia lo wordo husga pa un panel di experto y tambe pa e audiencia, ofreciendo asina un toke interactivo na e evento.
Riba diadomingo, 13 di october, lo bay presencia e competencia di Iron Chef. Tres chef participante lo crea platonan cu ta refleha nan arte y creatividad culinario. E chef cu ta gana lo hiba cas e titulo prestigioso di Iron Chef Aruba. Cada chef cu lo wordo acompaña pa studiantenan ganador di e Student Competition di studiantenan di E.P.I. y EPB cu a tuma lugar na comienso di september 2024.
Cu ritmonan y melodianan den caya di Wilhelminastraat lo percura pa crea e ambiente perfecto pa un fin di siman inolvidabel di cuminda, placer y celebracion cultural cu artistanan: Timothy Daal, JRaplh, Christopher Rudolfo, Kyle Winklaar, Angelo Kock, DJ V, Ronald Hopman, Chriss Kross, El Prove, Omar Kock, Johnny Scharbaay, y Datapanik.
Mientras Aruba ta celebrando su herencia diverso culinario rico y bibo, Autentico Aruba Culinary Festival ta reuni e mihor talentonan di e isla pa un evento cu ta honra tradicion mientras ta stimula inovacion.
