Pa e Hotel cu lo wordo construi eynan...
ORANJESTAD (AAN): Diahuebs mainta na ocasion di e prome aniversario di JOIA Aruba by Iberostar, gerencia a duna un update di tur e logronan cu nan ta haciendo na e Resort, tambe pa Aruba, y principalmente awor na Tierra del Sol.
Eynan Iberostar ta finalizando proceso pa bay construi un Hotel mas. E Hotel nobo ey lo bay bira e prome Hotel cu ta 100% auto-suficiente den awa. Segun Arnaud Le Lanchon, gerente general di JOIA Aruba, na Tierra del Sol nan lo bay construi un Planta di Filtra Awa, y esey nifica cu nada di riolering di e lugar aki lo wordo manda pa Bubali Plas.
E Planta di Filtra Awa aki lo bay produci ‘gray water’ cu Tierra del Sol y e Hotel nobo eynan lo haci uzo pa muha tur mata di nan paisahe, y di e cancha di golf.
Tabatin rumornan incorecto cu a circula encuanto e Hotel nobo aki na Tierra del Sol, y gerencia di Iberostar a haya necesario pa duna aclareacion riba esaki.
Prome punto ta cu e Hotel aki lo no wordo construi na Beach di Arashi. Hecho ta cu e Hotel lo wordo construi riba tereno di Tierra del Sol. Esey nifica pa bo drenta of sali di e Hotel aki, bo tin di drenta via e actual entrada grandi di Tierra del Sol.
Na Tierra del Sol tambe nan lo traha un ‘Shoco Boulevard’ for di banda di e Hotel bay te na e Faro di California. E lo wordo traha cu varios neishi cu Shoconan lo por bay haci uzo di dje.
Ademas, envez di traha cura di muraya di bloki, nan lo bay bek den e forma tipo di Aruba, cu ta traha cura di transhi y trankera. Tur esaki den nan plan di sostenibilidad, y e hecho cu lo kier purba pa e Hotel bay produci lo menos desperdicio posibel, cual ta cay den e vision di e compania madre Iberostar pa tur nan resortnan rond mundo.
