E Shoco aki tin un wowo so...
ORANJESTAD (AAN): Diahuebs mainta, JOIA Aruba by Iberostar a elabora riba tur nan logronan pa bienestar di e isla durante nan prome aña di operacion aki, y a enfatiza tambe nan enorme empuhe pa salbaguardia e Shoco di Aruba, cu ta e simbolo di Aruba.
Jareth Vermeulen a indica cu e sosten pa yuda tur Shoco na Aruba no ta djis keda na JOIA Aruba by Iberostar so, sino tambe na e propiedad di nan cu ta Tierra del Sol.
E caya mes banda di JOIA Aruba na Eagle Beach, a wordo yama ‘Shoco Boulevard’, y esaki tin un storia cu ne, y ta referi aki riba ‘Shoco Pirata’. Shoco Pirata ta su nomber, y e ta e parha mas conoci na JOIA Aruba.
Shoco Pirata a biba hopi aña riba e pida calichi cu tin pariba di Eagle Beach, cerca di e rooi unda awor JOIA Aruba a wordo construi. Un accident a socede como 3 aña pasa, ora auto a pasa y dal e Shoco. Esnan cu a bin haya Shoco Pirata herida, a dicidi na hibe pa Veterinario, y a haya sosten di Aruba Birdlife Conservation pa ricibi tratamento.
Shoco Pirata ta un parha Arubiano fuerte y potente, y a keda interna pa 2 aña cerca Veterinario pa purba na salba su wowo cu a haya golpi enorme den e accident. Sinembargo esey no por a socede, pues e Shoco a perde un wowo. Esey ta e motibo cu el a haya e nomber di ‘Shoco Pirata’, pasobra el a perde su wowo banda drechi.
Tabatin temor cu Shoco Pirata lo no por biba mas, pasobra ora nan ta busca nan cuminda, nan ta haci hopi uzo di nan orea y di nan wowo. Despues di esey, Veterinario a laga Shoco Pirata bek den libertad, y el a bula bay.
Pa sorpresa di nan tur, Shoco Pirata a keda bula y bula, te cu el a regresa na su cas cerca di Eagle Beach, net banda di e tereno unda ta bay construi JOIA Aruba. E trahadornan a mira esaki, y a pone General Manager na altura, y mesora a yama Jareth Vermeulen (experto di sostenibilidad di JOIA Aruba) y tambe Greg Peterson (Aruba Birdlife Conservation).
A delibera riba un solucion, y a pidi pa contratista sigui labora banda pazuid di e Hotel, te cu nan yega na un plan pa e Shoco Pirata. E idea a bin dilanti pa crea un area unda Shoco Pirata por keda biba y cria su yiunan, leu for di caminda.
Asina a crea Shoco Boulevard cu tin dos burrow (neishi) den dje, y pa nan sorpresa... Shoco Pirata a dicidi na bay biba den uno di nan, aunke e gusta su cas bieu y sa bay bek, pero tin biaha ora awa yobe, e canal ta yena y su cas ta yena. A purba pa blokea su cas bieu, pa asina e biba den e neishi mas safe cu nan a traha pe.
E plan pa Shoco Boulevard ta pa e rek for di Eagle Beach bay te na e rotonde di Avenida Nelson Oduber, cerca di Eagle Bowling. Nan plan ta pa traha 8 neishi pa Shoconan por bay biba den nan.
A bin haya sa recien, cu Shoco Pirata cu ta un parha fuerte, a haya “un pareha nobo”, y awor den nan neishi tin hasta webo recien poni! Diahuebs mainta, prensa a haya chens di bay tira un bista, y pa casualidad shon Shoco Pirata tabata pafo ta mirando prensa cu nan camera ta saca potret bay goal.
Y Shoco Pirata mirando nan uno-pa-uno, cu su unico wowo, sintiendo cu e ta gozando di su bida den spotlight dilanti tanto paparazzi. Danki Iberostar pa yuda proteha e Shoco di Aruba.
