Segun Jacqueline Semeleer di Banco di Sanger
ORANJESTAD (AAN): Durante e ultimo lunanan, tabata tin hopi accidente serio cu a tuma luga na Aruba. Tambe, na Hospital tin hopi operacionnan y partonan na unda tin un perdida grandi di sanger. Señora Jacqueline Semeleer, Kwaliteitsfunctionaris Banco di Sanger y Hemovigilantie HOH, den un entrevista cu DIARIO a remarca cu tin un demanda grandi pa donante di sanger.
Segun e, e departamento ta pasa den dificultad pa haya donante di sanger. E total di donante na Aruba actualmente ta 1300. Segun reglanan di World Health Organisation, e mester ta na 2500. Aruba ta keda 1200 donante cortico.
El a expresa cu specialmente, nan no ta haya donantenan cu ta di e gruponan negativo. Segun e, nan mester yama entre 30 pa 40 donante pa logra 2 of tres persona bin duna sanger. Esaki segun e, ta mescos pa e grupo di O+ y A+ cu ta e gruponan di sanger mas hopi den e poblacion na Aruba.
El a bisa cu di e poco donantenan cu ta bisa cu nan lo pasa duna riba e fecha organisa, varios ta cancela riba e fecha ey of no ta aparece. Bisando esaki, el a remarca cu ta hopi importante pa no solamente donantenan, pero comunidad henter, ta mas consciente di e importancia pa duna sanger. Una bes, el a bisa, cu un persona bira un donante, e ta haci un compromiso pa duna sanger.
E interes pa bira donor, segun señora Semeleer, no ta mescos cu antes. Apesar cu toch tin mas hende cu ta bira donante, varios otro ta cay afo pa diferente factor, entre otro vergrijzing of hobennan cu ta bay biba afo. Y e sanger cu drenta, ta sali bek, haciendo cu semper tin e necesidad pa mas donante.
Pa bira un donante, tin rekisitonan pa cumpli. Pa cuminsa, e persona mester ta boluntario, 18 aña y mas, y bon di salud. Por subi riba website di Banco di Sanger na unda tin tur informacion y rekisitonan pa bira un donante. Eyriba por contesta preguntanan y na final e sistema mes ta indica na bo persona si por bira un donante of no.
Y esnan cu si por bira, lo por manda aplicacion via e website y Banco di Sanger lo contacta e persona pa mas informacion y pa nan cuminsa cu e proceso di keur cerca un docter pa wak si e persona ta adecua pa ta un donante. Y despues di dos luna, e persona lo haya contesta si e ta cla of no pa bira donante.
