Entrante awe 1 juli 2021 - ORANJESTAD (AAN): Tienda di Educacion ta existi pa 9 aña brindando servicio gratis na henter comunidad di Aruba.
Tin varios servicio cu ta wordo duna pa nos expertonan ora ta trata sosten y guia na mayor.
Nan servicionan ta consisti di duna charla, tayer of informacion na diferente scol y tambe gruponan meta. Un otro servicio cu Tienda di Educacion ta brinda ta sosten y guia telefonico via 161. Mayor of educador por tuma contacto nan pa cualkier pregunta ora ta trata lantamento di un mucha. Tambe si ta desea un conseho con pa comunica of disciplina un yiu.
Por yama of bishita nan tambe pa un consulta gratis na nan oficina situa den edificio di Centro pa Hoben y Famia adres Wayaca 68-C.
Entrante 1 juli 2021 nan servicio telefonico di 161 ta conoce un cambio den orario. E servicio di 161 ta disponibel, desde e fecha menciona, di dialuna pa diabierna di 8 am – 7 pm non-stop pa asina por sigui brinda e bon servicio manera semper.
Por comunica cu nan tambe via This email address is being protected from spambots. You need JavaScript enabled to view it., bishita nos pagina di Facebook y YouTube channel of subi ariba nos website www.tdearuba.com pa mas informacion.
Tienda di Educacion ta pone enfasis ariba educacion di un yiu. Un sonrisa den cara di nos yiu por haci milager. P’esey ta importante pa mayor of educador trece alegria pa nos yiu(nan) por tin un infancia sano y desaroya positivamente. Ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta. Tur yamada na 161 ta anonimo.
Bienestar y siguridad di e muchanan ta responsabilidad di nos tur! Ban cuida y lanta e muchanan cu hopi amor y compasion pa asina crea futuro generacion sano y di bon boluntad. Ta un bon ehempel pa e muchanan y haci un diferencia positivo den nan bida.
