ThunderBox297 cu nan prome participacion como ekipo na Ftville 2025

ORANJESTAD (AAN): Durante weekend cu a pasa, atletanan cu ta entrena na “ThunderBox297”, un centro di entrenamento nobo na Santa Cruz,

a participa na e evento mas grandi di aña di “Functional Fitness” cu ta Ftville Caribbean Championships 2025. Evento aki ta conta cu 2 competencia, unda a participa den un deporte nobo cu a cuminsa gana hopi popularidad mundialmente cu yama HYROX y e competancia di Functional Fitness of manera e ta mas conoci “CrossFit”.

   ThunderBox297 a mira propietario Ross Ismail hunto cu partner Regi Boekhoudt participa den e evento di Hyrox den e division “pro”, iniciando e competencia pa e ekipo completo. Den e division di individual RX cu ta e division mas fuerte di Functional Fitness, a mira Aline Rios dos Anjos y Lucas dos Anjos participa den un veld grandi di atletanan di nivel halto. Ambos a bataya fuerte y a logra un bon prestacion final. Finalmente, atletanan Christy Rodriguez y Pauline Vackier (Team Ban pa Bay) a competi den e division di partner Intermediate Female, unda den un veld grandi a logra termina na di tres luga riba podium.

   ThunderBox297 ta felicita F3A Aruba, e federacionan local di Functional Fitness pa e tremendo organizacion y tur atleta cu a participa na e gran evento aki. E deporte di funtional fitness ta keda popular danki pa eventonan cu ta mustra nos comunidad con great e deporte ta.

   Pa esnan cu ta interesa den conoce ThunderBox297 mas di cerca, por semper tuma contacto via rednan social na @thunderbox297 pa asina haya mas informacion di kico tur ta worde ofreci.