Saul Raghunath Aldea a gradua como meester in de rechten na Hulanda

ORANJSTAD (AAN): Recientemente Saul Raghunath Aldea a gradua exitosamente como Master den Derecho di Empresa/ Master Ondernemingsrecht na Universidad di Tilburg.

   Aparte di esaki, Saul tambe a amplia su conocemento y a specialisa den e programa di Master International Business Law: Digital Innovation in Commerce and Finance. Esaki ta un area moderno y hopi relevante den mundo di negoshi cu ta combina ley cu tecnologia, innovacion y finansa.

   E culminacion di e estudio a yega cu Saul a defende su tesis investigativo titula: ‘Meer dan de winst: de staatsaandeelhouder in de ESG-uitdagingen. Een rechtseconomisch en rechtsvergelijkend onderzoek naar de uitdagingen van de ESG voor de staatsaandeelhouder in de corporate governance van staatsdeelnemingen’.

   Den su tesis Saul a investiga con tema di sostenibilidad, responsabilidad social y gobernansa empresarial ta influencia e papel di estado como accionista minoritario den participacion di empresa publico.

   E defensa di tesis a tuma luga dilanti e comision academico bao di direccion di profesor dr. C.F. van der Elst y profesor dr. mr. G.J.H. van der Sangen.

   Pa comparti e momento special aki, su mayornan Dennis Raghunath y Yvonne Raghunath-Aldea a biaha pa Hulanda pa celebra su graduacion. Nan ta sumamente orguyoso di e logro grandi cu Saul a alcansa. Den e ocasion aki Mirto Werleman hunto cu Angela Werleman y Angelica Ceballos tabata presente pa felicita Saul.

   Cu e logro aki, Saul ta completa un logro importante y ta wak dilanti cu confianza pa futuro.