ORANJESTAD (AAN) – Thomas Ruiz, Secretario di VRA (Vereniging Rijscholen Aruba, ta vocifera su preocupacion,
mescos cu henter comunidad tin, door di e accidentenan cu ta sosodiendo ultimamente, riba peatonnan.
Den entrevista cu DIARIO, Thomas Ruiz a bisa cu e ultimo accidente fatal cu tabata tin, na La Sallestraat, cu ta conoci como un ‘zona di 30’ unda tin hopi borchi poni, cu ta maximo 30 km pa ora bo mag di core.
Ruiz a señala cu al respecto tin mas pregunta cu contesta, y VRA su pregunta principal ta ki señal Ministerio Publico y Minister di Husticia, y otro instancianan ta mandando, cu e situacionnan aki.
“Tin diferente ley cu mester tene cuenta cu ne. Ta trata di un peaton di 84 aña, canando cu un garoti, den un zona di 30, el a cruza caya. Durante les, nos ta siñando aki cuater ley cu ta duna e peaton preferencia. E prome ta e zebrapad. E mester tin e borchi y e liñanan; un zebrapad legitimo. E di dos ta bisa, bo no mag di cruza dilanti di un auto cu ta bo contrario. E di tres ta bisa bo no mag di bira drechi-robes y corta caminda di un peaton of un ciclista.
“Esun di mas importante ta di FAVI, cu ta bisa cu un persona ciego cu un garoti guia y cu tin limitacion di movilidad, tin preferencia. Eigenlijk e ta fout pasobra nan mester a pon’e ariba, pero como no a pon’e asina, e ta nifica cu nan por cruza tur caminda unda cu nan kier, con cu nan kier, pues, cu otro palabra nan ta Dios riba caminda”, Thomas Ruiz a relata.
Ruiz a sigui splica cu unda e peaton a cruza, a bin un pick up grandi, e mester a core mitad grado, den e ley di comportacion esey ta e prome pregunta con bo ta comporta bo mes den trafico, di tal manera cu no ta stroba e fluho y cu no ta pone e trafico na peliger. Articulo 4 tambe ta bisa cu e chauffeur mester maneha di tal manera cu no ta bay ocasiona ningun accidente, cu ta lesiona o causa morto di un hende.
