Hues ta haya cu Gobierno a actua incorecto
ORANJESTAD (AAN): Diaranson mainta Hues a dicta sentencia den e caso Lar cu señor Richarson a cuminsa contra Gobierno. Abogado mr. D. Kock a representa señor Richardson caminda a protesta contra e decision di hefe di VDA cu a hala aden e documento di integridad di Richardson dia 20 Mei 2024. Mr. Kock a cuestiona e hecho cu segun maneho, ta cada 5 aña mester haci e evaluacion di integridad y den e caso aki den un periodo di 3 aña a haci esaki. E ta haya cu mester rechaza e decision di hala aden e documento di integridad di Richardson.
Di parti di Gobierno, mr. Caster a mustra cu tin un regla nobo cu ta cada 3 aña ta haci evaluacion y a haci esaki pasobra tin kehonan di empleadanan na e oficina di Nationaal Centraal Bureau Terrorrrismebestijding, Veiligheid en Interpol (NCTVI) riba e comportacion di Richardson. Den e evaluacion di e hefe di VDA cu ta mustra entre otro cu Richardson lo a acerca algun dama sexual, cu a actua no suficiente profesional y irresponsabel pa e damanan.
Evaluacion di Hues: Hues den su evaluacion di e caso ta mustra cu segun ley, solamente si tin un un situacion incidental, lo por haci e investigacion di nobo riba integridad di un persona cu tin un funcion di confianza, den un periodo menos cu 5 aña. Hues a mustra cu diferente biaha el a puntra e abogado di Gobierno, si tabatin motibo incidental pa a haci e investigacion di integridad y e abogado a bisa cu no. Hues a mustra cu el a puntra e abogado si e keho di e dos damanan na 2024, tabata motibo cu a haci e investigacion riba integridad di Richardson. E abogado a contesta cu no y cu e investigacion tabata relaciona cu e maneho nobo cu cada 3 aña ta haci investigacion riba integridad.
Na opinion di Hues, esey ta haci cu Gobierno a viola e ley cu ta regarda e investigacion riba integridad di . Hues a bisa cu segun e ley, cada 5 aña por haci e investigacion riba integridad y den e caso di Richardson, esey mester sosode na December 2025. E investigacion riba Richardson a sosode na 2023 y 2024 cual ta hopi mas promer cu December 2025.
Hues su decision ta cu e ta declara cu e protesta di Richardson tin base y cu e ta destrui e decision di 29 Augustus 2024 riba cual a protesta. Hues ta hala aden tambe e decision di 20 Mei 2024. Esey ta nifica cu Richardson ta mantene su declaracion di integridad.
Loke no ta para den e sentencia, si Richardson por bolbe ocupa su funciona di director di (NCTVI).
