Diamars 10 di juni proximo:
*Lo tin control di bista, gratuitamente
ORANJESTAD (AAN) – Catherine Midi, Coordinador di Actividad na Fundacion FAVI, a duna informacion den entrevista cu DIARIO, tocante un evento cu lo tuma lugar diamars 10 di Juni awo.
Ta trata aki di un charla educativo pa e comunidad di Aruba, unda ta bay tin un oculista di ImSan dr. Zuleima Lacle, ken ta bay splica kico Diabetes su efecto ta pa un hende su bista.
E evento aki ta bay ta anochi di 7 pa 9’or, pero di 6 pa 7’or ta bay tin chekeo di bista. “Eye Center” di ImSan lo ta presente, pa duna e servicio aki gratuitamente.
“E idea tras di esaki ta, eigenlijk, pa comunidad por bin haya informacion. Si bo ta un persona cu ta biba cu un hende grandi, of un persona cu kier sa un tiki mas di diabetes y bo no tabata sa cu esaki tin efecto riba bo bista, bin. Parkeo ta amplio, y bo ta haya conocemento, informacion, y kico por haci pa preveni cu mañan bo por perde bo bista door di diabetes”, Catherine Midi a relata.
El a menciona tambe cu FAVI tin clientenan cu a perde nan bista door di Diabetes. Un di nan a perde su bista na un edad hopi jong. “E ta hopi alarmante”, Midi a expresa.
Catherine a menciona cu FAVI ta concientiza nan clientenan, for di chikito, pa baha man na sucu, wak con nan ta come pasobra na final tur esaki tin efecto ora nan ta un tiki mas grandi, no solamente riba nan salud, pero tambe riba nan bista cu ta locual FAVI ta enfoca.
“Tin hopi mas cu alimento, cu ta haci cu e bista ta bay atras. Aworaki nos ta constantemente riba un telefon. E luz di e telefon ta haci cu na dado momento bo ta bay haya miopia. Bo bista ta keda bay atras Hopi lihe. Nos ta biba na Aruba pero hopi hende no ta cana cu bril di solo, solo ta seca bo wowo y na dado momento bo ta haya glaucoma, presion di wowo, y tin hopi otro cos tambe rond di nos, cu nos ta pasa den dje, den nos bida diario cu tambe tin efecto riba nos bista”, Catherine Midi a comenta.
E dama a agrega cu FAVI ta drentando scolnan. Nan tin muchanan cu ta bay scol, y nan ta wordo acerca door di scol pa duna informacion y stimula e muchanan tambe pa cuida nan bista, pasobra no ta facil pa no tin bo bista y bo tin cu sigui bo estudio.
“Nos tin dos maestra ambulante cu ta haci lo maximo, pa asina ey nos clientenan cu sea tin limitacion di bista, of cu ta completamente ciego, por sigui un estudio mescos cu tur otro mucha”, Catherine Midi a señala.
