Segun Francis Saladin:
*Cu esaki lo alivia costo di bida
ORANJESTAD (AAN)-- Siguiendo cu e tema di flete, cual prijs el a aclarea cu no a subi, Francis Saladin, di Comerciantenan Uni Aruba (CUA), a splica DIARIO, cu e consecuencianan lo ta hopi grave si, en caso cu e bunker surcharge subi tres biaha, pasobra e efecto lo ta directo riba costo di producto.
“Esaki ta haci cu e prijs di producto mesora ta subi. Atrobe, nos ta papia hopi cu Aruba ta caro, cu comerciantenan ta pone prijs halto, y mi ta reitera cu comerciantenan na Aruba no ta pone prijs; nos ta haya un prijs di companianan na unda nos ta cumpra nos productonan, nos ta pone flete riba dje.
Tin otro discusion riba dje na unda cu gobierno ta cobra belasting BBO riba e prijs di e producto, plus e flete. Esaki ta un punto cu nos a bin ta discuti den Covid-19 tambe. Pa gobierno trece alivio, por fabor elimina impuesto riba flete, pasobra esaki ta algo cu ta ilogico, ta e producto cu invoerrechten y BBO mester ta riba dje, y asina ey bo ta yuda pa e prijsnan no subi asina tanto”, Francis Saladin a acentua.
“Awo kico ta bay pasa? Cu e bunker surcharge ta subi, prijsnan ta bay subi pasobra na fin di dia e comerciante tin cu berekenen door, e BBO ta bira mas halto y e producto ta hisa su prijs.
