ORANJESTAD (AAN): Michelle Mendez Fonseca ta PR Manager hunto cu Amber Riley, Biologo Marino di The STEM Embassy a haci un invitacion na comunidad di Aruba pa nan proximo evento.
El a laga sa cu The Stem Embassy ta un organisacion funda door di 12 studiante di Aruba y Corsou, cu ta biba na Hulanda, Merca y Suiza unda nan mision ta pa promove y inspira studiantenan na e islanan ABC den STEM cu ta para pa Ciencia, Ingenieria, Tecnologia y Matematica.
Nan ta haci esaki pa medio di nan evento cu yama 'Ki' ta bo STEM Camp' y awor nan ta organisando nan di dos evento na Aruba y esaki ta encera cu nan ta bay duna 6 diferente workshop manera kimica, coding, biologia marino, cu e meta di mustra e hobennan y publico cu por studia STEM na Aruba.
Esaki lo ta enfoca riba studiantenan entre 12 cu 21 aña unda ta bezig cu muchanan pa kies pakket y studiantenan cu ta cabando nan scol, a splica.
E evento ta tuma lugar dianan 26 pa 29 di Juli na Universidad di Aruba.
