Gino Goeloe, director di WGK:
*E aña aki embarazo hubenil a bolbe lanta cabes
ORANJESTAD (AAN) – Gino Goeloe, director di Wit Gele Kruis a comenta den entrevista cu DIARIO, cu casonan di mama hoben (adolescente), a lanta cabes atrobe na Aruba, y WGK a ripara cu nan ta haya depresion y ansiedad post parto.
Tin di e mamanan aki cu ta haya pensamentonan negativo, y mas tanto ta señala esaki den mamanan teenager.
Gino Goeloe a referi na e señalnan. Actualmente, WGK tin 25 cliente mama hoben, mientras cu aña pasa, cu compara cu e mesun temporada aki, na 2022, tabata tin 13. Eynan por mira cu e cantidad di embarazo hubenil a subi drasticamente.
E barionan unda a registra mas mama hoben ta: Santa Cruz cu 11, Dakota cu 7, San Nicolas 2, Oranjestad 2 y Noord 3.
“Algo cu nos a bin ta señala tambe ta, cu nos tin dos mama hoben di 14 aña, cu ta algo alarmante, y mi ta kere cu esaki tin di haber tambe cu e temporada di carnaval y campamento cu mester bin ainda, pero cu ta premira caba ya cu añanan anterior a baha, pero no tabata tin carnaval. “Pesey nos ta wak cu e ta halto y eynan nos ta bay traha riba dje tambe, sigur den bario di Santa Cruz y Dakota; wak kico ta pasando na scolnan den e barionan”, Goeloe a indica.
El a menciona tambe cu te aworaki WGK tin registra 430 baby cu a nace na 2023, cu ta un cifra hopi abao compara cu 2022. Aña pasa a nace 912. Director di Wit Gele Kruis a menciona cu den su experiencia di 21 aña den e posicion aki, esaki ta e cifra anual mas abao cu a wordo registra, pasobra semper nan ta registra riba mil nacemento y esey ta un tendencia cu tambe por bay registra menos di mil baby naci na 2023.
E “baby boomers” di carnaval ta nace entre October cu November, y mester warda esey ainda, y Goeloe ta spera cu eynan e lo subi un tiki. WGK ta wak e parti unda menos baby ta nace, pero tambe ta wak e parti di envehecimento di e poblacion, cu tambe ta algo cu ta causa preocupacion, pasobra WGK ta wak den e listanan di spera di e grandinan cu ta pidi pa cuido, cu por maneha te awor, pero e ta aumentando mas y mas.
Goeloe a bisa cu nan a bati alarma caba, y nan tin contacto cu nan partnernan eyfo, cu cualnan WGK ta comparti nan cifranan tambe, manera CBS cu WGK ta traha hopi cerca di dje, por delibera riba maneho di esaki.
