Prome Minister pa lidernan sindical: --- ORANJESTAD (AAN) – Den su mensahe di Diaranzon, Prome Minister Evelyn Wever-Croes,
alavez cu ta invita tur e lidernan sindical pa sinta na mesa di dialogo cu Gobierno, encuanto nan demanda pa e empleadonan publico haya nan 12.6% bek, a expresa cu tempo no ta nan fabor.
“Tempo no ta na nos fabor. Tempo ta bay caba cu nos un djis. Reunion di Conseho di Minister di Reino, ta otro siman Diabierna, y si nos no yega na algo conhunto, nos mes ta duna Hulanda atrobe, oportunidad pa tuma decision pa nos; decision cu lo conta pa henter aña 2022. Pesey di akinan, un biaha mas mi ta extende invitacion na tur lider sindical. Gobierno kier mescos cu e lidernan sindical kier!” e dignatario a reitera.
El a bisa cu gobierno tambe kier drenta den e fase di recuperacion y den e etapa cu Aruba no ta depende mas di Hulanda, y asina por elimina e recorte di salario, y a bolbe acentua cu pa por logra esaki, nan mester bay den dialogo.
“E invitacion ta keda. E Comision financiero cu a wordo apunta pa esaki, ta cla pa reuni na cualkier momento, pero tempo no ta na nos fabor. Mi ta spera cu e clase trahador aki na Aruba, tur esnan cu ta wordo afecta pa e accionnan aki, por fabor papia cu bo lider sindical; y ban corda cu na e momentonan aki, Aruba ta den pleno recuperacion, pero nos no a yega ainda. Na e momento aki, Aruba mester di nos tur pa por logra e recuperacion, bienestar y progreso di nos pais”, Premier Wever-Croes a conclui.
