Pa tur votado di empresa chikito --- ORANJESTAD (AAN): Camara di Comercio y Industria (KvK) kier a recorda tur votado di empresa chikito (Kleinbedrijf)
cu e eleccion via votacion pa miembro di Directiva KvK lo tuma luga riba diahuebs 9 di december proximo di 9.00 am te cu 12.00 pm den auditorio di KvK.
Manera a anuncia anteriormente, e biaha aki tin 1 puesto disponibel pa Kleinbedrijf y 3 candidato a postula nan mes pa e posicion aki.
E candidatonan ta: Jaritza Janila Correa, August Anthony Croes y Lay Hing de Kort-Yee. Pa mas informacion di e candidatonan por bishita e Facebook page of website di KvK.
Durante di e orario di eleccion, e votadonan cu tin derecho di voto y cu ta figura riba e lista di votado pa Kleinbedrijf, mester presenta en persona den e auditorio di KvK cu un id valido (cedula, rijbewijs of paspoort) huntu cu e carchi di votacion (oproepingskaart).
Den caso cu a lubida e carchi di votacion o no a ricibi esaki, lo otorga un duplicado na e votado. E votado ta entrega e carchi di votacion of e duplicado y lo ricibi e papel pa vota (stembiljet). Riba e papel pa vota e votado ta yena e hoki tras di e nomber di e candidato di su preferencia (ta yena 1 hoki so).
Conforme e reglanan vigente pa cu Covid-19, uzo di tapaboca ta obligatorio den e edificio di KvK.
