Cu e debut di Orlando Urdaneta: --- ORANJESTAD (AAN) – Diaranzon mainta, previamente na e presentacion di e obra “Señoras de Maracaibo”,
cu a tuma lugar den Cas di Cultura e mesun dia aki, anochi, e actornan Venezolano a duna un conferencia di prensa, na Hyatt Place.
Ta trata aki di e actornan Orlando Urdaneta, Daniel Sarcos y Leo Colina. Nan a bishita Aruba un bez mas, awo como profesional, den oportunidad di presenta den Casa di Cultura cu e obra Señoras de Maracaibo. Asina Daniel Sarcos a duna di conoce.
Sarcos a splica cu “Señoras de Maracaibo” ta un obra custumbrista, cu ta recorda e tianan, abuelanan, tianan-abuela, cu ta representa hopi e Zulianidad y su gentilicio, y pesey nan ta hopi contento di presenta e obra aki, na Aruba.
“Nos ta bin di algun presentacion na Merca ya cu nos tur, cu ta involucra, ta biba na Merca. Nos a haci como cinco presentacion caba na Miami, casi di manera consecutivo. Nos tin un dia 19 di December ya pa cera aña 2021. Nos a presenta na Dallas, Houston, Orlando, entre otro lugarnan di Merca y awo ta toca nos e oportunidad di presenta na Aruba”, Sarcos a menciona.
El a splica cu Orlando Urdaneta a suma su mes na e presentacion aki, cual ta su debut y un orguyo, Sarcos a expresa, mirando e gran trayectoria, meritonan y reconocimento cu Urdaneta tin. “Pa nos ta un soño di por a comparti e escenario cune awe, den Cas di Cultura, pa 7’or di anochi”, Daniel Sarcos a bisa.
E tabata un anochi di humor y gaita cu sabor Zuliano y un ocasion pa e publico local, por a conoce un tiki mas di kico ta ser un venezolano, manera Sarcos a expresa pa conclui.
