Pastor Jose Miguel Nava:
ORANJESTAD (AAN) – Pastor Jose Miguel Nava, Kateketiko Diosesano Aruba (IKDA), den entrevista cu DIARIO a expresa cu comunidad mester corda cu nos ta den aña di Hubileo, cu ta un aña di speranza, cu Papa mes a invita Iglesia pa bay paden y medita riba e forza di speranza.
“Specialmente, den e final di un aña, e pueblo y e hende, normalmente ta purba di traha na proposito di kico kier logra e aña nobo. Pero despues di esey ta bin e tempo di Cuaresma. Nos por keda cu hopi proposito bunita, cu hopi obhetivo y metanan grandi, pero e idea ta cu nos mester logra nan. Y hopi biaha pa nos por logra un meta nos mester renuncia na nos mes. Mester kita tur loke ta stroba nos y e tempo di Cuaresma ta un tempo di gracia y di mision, cu ta invita nos pa nos purifica nos mes, pa nos por bira e miho version di nos mes”, Pastor Nava a señala.
Pastor Nava a indica cu e tempo di Cuaresma ta cuminza awe mes, Diaranzon 6 di Maart, cu ta Diaranzon di Shinishi. “Cu ne nos ta reconoce cu nos ta hende pecador y como tal, esey ta nifica cu mi ta un hende debil, cu meymey di mi debilidadnan mi ta capaz di reconoce nan, na mesun tempo mi kier supera y mi ta conta cu Dios Su poder pa mi por supera cada un di mi debilidadnan aki.
“P’esey, arepenti di mi picanan mi ta bay cerca un Pastor, pa pone shinishi riba mi frenta, p’asina pidi Dios Su bondad y Su Misericordia”, e sacerdote a expresa.
El a referi na un Evangelio special cu por ilumina nos y cu ta e Evangelio di e Diadomingo proximo, y cu ta segun San Lucas, Capitulo 4. “Hesus a regresa for di Jordan, yena cu Spirito Santo, cu a hay’e hib’e den desierto”.
Pastor Nava a bisa cu e buniteza di e tempo di Cuaresma ta esey. “Nos mester laga Spirito Santo hiba nos den e desierto. Hiba nos den e desierto di nos bida, hiba nos den e desierto cu nos problemanan, laga Spirito Santo hiba nos, pasobra E ta esun cu ta bay guia nos cual ta e cosnan cu nos mester ranca di nos bida, si enberdad nos kier bira e miho version di nos mes”, Pastor Jose Miguel Nava a señala.
