Caso di Ayden Lanoy
*Pueblo tin sentimento di duda den trabao di Husticia
* Cuerpo Policial no tin ningun Psicologo den dienst
ORANJESTAD (AAN): Diamars mainta a tuma lugar e Reunion di Parlamento pidi pa fraccionnan di PPA, AVP, y Futuro pa haya sa kico e maneho di investigacion ta na Ministerio Publico Aruba, y tur detaye extra rond di e recien incidente tragico na Madiki Kavel, unda un hoben a ser tira mata door di Polis, cu a crea un ola di reaccion den pueblo, unda a manera perde confiansa den Cuerpo Policial.
Stephany Sevinger di AVP a duna un declaracion pa splica cu e ta un reunion doloroso, y a haya lamentable cu pa colmo Ministerio Publico no tabata presente den e Reunion, debi na e hecho cu hopi di e dudanan cu awendia ta biba den comunidad ta dirigi specificamente riba O.M.
Sevinger a agrega cu e tey pa transmiti e mensahe cu pueblo ta manda pa nan como Parlamentario y e ta un situacion dificil pa splica, cu pueblo di Aruba tin sentimento di rabia, sentimento di miedo, y sentimento di duda specificamente den trabao di Husticia.
E reunion di Parlamento ta uno caminda kier brinda trankilidad na pueblo, vocifera loke ta nan preocupacion, pero tambe pa duna un declarcion di politiconan cu nan no ta contra Cuerpo Policial. Nan ta ‘biba hunto’ cu nan y cu e trabao cu nan ta eherce. Tin ocasion toch cu hende por comete eror. Aki tin 2 miembro di Cuerpo Policial cu ta bao investigacion.
“Con nos ta splica un mama y un tata, cu 18 bala a wordo tira riba un ser humano. Diesocho bala riba un hoben di 19 aña. Con nos ta splica esaki na nos comunidad, y con nos por garantiza cu algo asina aki nunca mas lo no socede,” Sevinger a puntra den e reunion.
Ta debi na presion di pueblo, diripiente Ministro di Husticia a core yama un conferencia di prensa den cual tabatin ningun informacion, y Ministerio Publico para dilanti mic pa bisa cu ‘tin polisnan sospechoso’ pero aparentemente no sa di con nan ta sospechoso, y Ministerio Publico tampoco no kier a los inicial di Polisnan.
Sevinger a bisa cu si acaso tin motibo pa esey, mester bisa ta cua trato special cu ta garantizando esaki. Pasobra cualkier otro caso mesora O.M. lo duna e inicial di sospechosonan, pues pakico aki no kier a haci’e.
A ser treci dilanti cu Body-Cam pa agentenan policial a wordo busca como 1 aña pasa, y cu ainda e ta poni den un temporada di prueba. E pregunta ta cuanto tempo mas tin di warda prome cu nan por drenta den uso. Pasobra den e caso aki, un Body-Cam lo por a duna investigadornan e contestanan hopi rapido mes. A ser bisa cu na Aruba no a ni papia ainda mes encuanto Dash-Cam pa instala den patruyanan di Polis.
Tambe a menciona den Parlamento cu ta solamente un biaha so un Aspirant Agent van Politie ta pasa den ‘test sicologico’, y despues di esey nunca mas.
Otmar Oduber di PPA tambe a hiba palabra, y a reconoce presencia di e mayornan di e hoben Ayden Lanoy den Parlamento e mainta ey. El a bisa cu nan trabao ta pa netamente evita cu e sucedido aki por ripiti su mes den futuro, y duna confort no solamente na mayornan cu tin hopi pregunta ainda, pero tambe pa percura cu loke por a bay robez of no, ta e miembronan di Staten tin di yuda pa e proceso aki y cu casonan asina nunca mas ripiti su mes.
Oduber a reacciona tambe riba cierto declaracionnan cu nan lo ta bezig ta ‘haci politiek’ den Parlamento cu e asunto aki. Pero pueblo ta expresando un monton di preocupacion encuanto loke a socede, y comunidad mester tin siguranza cu nan derechonan ta wordo defendi como debe ser.
Ademas di esey, Oduber a puntra Ministro pa splica kico e regla/protocolnan ta exigi durante un persecusion policial. Entre otro kico e reglanan ta cu ora ta persigui un auto of hende riba un caya habri, y e diferencia ora di persigui den un zona habita. Kier a haya sa reglanan pa tene cuenta cune ora di los tiro. Tambe si tin regla cu ta recorda e agente riba e derechonan di e ciudadano durante un persecusion.
Oduber a bisa cu ora cu a tira 18 biaha den e zona ey hopi habita, danki Dios cu e marduga ey ningun hende tabata pafo e momento ey ta recogiendo corant den cura. Fuera di esey a elabora riba e ‘onderbezetting’ di 65 porciento den Cuerpo Policial, por compronde e presion sicologico rond di esey.
Gino Goeloe di Futuro aki a keda asombra cu e onderbezetting ey, y ta puntra su mes ta con bo por funciona ora bo ta traha cu stress y cu horario di 14 of 16 ora pa dia, ta con e agente por funciona asina? Corda cu Polis ta keda un ser humano, y ta tende di agentenan ta bisa cu nan man ta yen, nan tin hopi stress, cu trabao di double-shift, y no tin bida familiar tampoco.
E Parlamentario nobo ta indica cu tin di bay pone placa pa yuda busca mas agente policial, pasobra no por sigui asina cu e onderbezetting.
El a keda asombra pa tende cu Cuerpo Policial di Aruba no tin un Psicologo riba payroll. “Mi a keda babuca,” Parlamentario Goeloe a bisa. “Con por ta posibel? Personaan aki ta traha 14 pa 16 ora y no tin Psicologo den Dienst. Personanan aki mester di ayudo, sosten, tin di wordo tendi,” el a sigui declara.
E ta OK pa pone fondo pa Ministro haya un psicologo pa guia su Polisnan.
