Caso di tiramento na Madiki Kavel
- Sigura cu ta ofrece yudansa Psicologico na Polisnan
ORANJESTAD (AAN): Diamars te den oranan di atardi, Ministro demisionario di Husticia, Rocco Tjon a haya chens di hiba palabra den Sala di Parlamento relaciona cu e reunion cu a ser yama door di PPA, AVP, y Futuro relaciona cu recien incidente, unda un hoben a perde su bida ora cu el a wordo tira na final di un persecusion door di Polis na Madiki Kavel.
E reunion a wordo yama, pasobra por sinti cu pueblo keto bay ta hayando duda, tin rabia, y ta spanta riba loke a pasa y cu nan no ta hayando informacion di loke a socede, siendo cu videonan a sali riba caya cu a destrui completamente e prome relato policial duna encuanto e incidente aki.
Ministro Tjon a cuminza ta extende palabranan di forza na mayornan di e hoben Ayden Lanoy cu tabata den Sala di Parlamento. Tjon a bisa cu e mes como tata, como ex-miembro di Cuerpo Policial, y como Ministro di Husticia. Di comienso el a bisa cu e no por bay ‘specula’, pues tin di bay a base di hechonan, a base di informacion concreto.
E titular di Husticia a splica cu e tambe ta sinti e mensahenan cu a wordo transmiti door di miembronan di Parlamento, di e sentimento rond di e caso, y a hasta bay di acuerdo cu e palabra “hororoso” cu a wordo bisa den reunion. Pero e ta purba pa evita cu e investigacion ta wordo contagia. Pues no a duna declaracion riba nada cu por stroba e investigacion.
Con por demostra cu tin transparencia den e investigacion aki? Ministro a contesta cu exactamente debi cu e investigacion aki ta wordo conduci segun e inzet-criteria splica na Parlamento, y Landsrecherche cu ta un organo independiente ta haciendo e investigacion aki, y eynan Cuerpo Policial no ta envolvi. E investigacion ta wordo conduci bao mando di Ministerio Publico.
Riba pregunta di Body-Cams, a sali na cla cu den pasado a duna splicacion den conferencia di prensa, cu tabata un proyecto cu ta mara na e proyecto di Cameras rond di Aruba, y e ta den e fase piloto, pues ya caba tin agentenan policial cu ta haci uso di nan, y resultado lo wordo evalua pa mira despues con e lo wordo evalua pa su uso den Cuerpo Policial.
A haci pregunta riba test psicologico, cu ta un ‘leiderschapsvraagstuk’ cu ta haya su debido atencion den Cuerpo Policial. Tur esnan den puesto di liderato ta haya esaki den cuadro di e personeelszorg, esaki ya ta tuma lugar caba. Un agente policial cu e mester di e ayudo aki, ora cu e indica esey den combersacion cu su hefe, e ayudo aki ta wordo brinda tambe.
Ademas di esey, ya for di 2024 tin un proyecto cu a wordo aproba, cu ta forma parti di henter e programa di Salud Mental pa Cuerpo Policial en general, y e ‘Mental health program’ aki ta encera ehercicionan, training, y combersacion cu miembronan di Cuerpo, y tambe e ayudo y cuido ta wordo brinda na tur esnan cu mester di esaki.
Tjon a bisa cu cada agente policial tin e autoridad discresionario unda e ta analisa e situacion, y den cuadro di ley e ta dicidi con e ta actua. Ministro a duna Parlamento e documento di Ambts en Geweldinstructie pa Polisnan pa nan mira aden, y na Articulo 38 y Articulo 50 ta poni exactamente ki ora un Polis mag di haci uso di su arma, y ta splica tambe ki paso e mester tuma despues di a haci uso di e arma.
Tin un Korpsorder cu ta regarda uso di sirena y zwaailicht, y ta splica detayadamente ademas di ley di trafico, ta menciona ki ta momento cu un patruya por usa e luznan aki, e.o. pa persigui un persona.
E contacto cu famia despues di e incidente no a djis keda den man di Bureau Slachtofferhulp, sino Altocomisario mes tin contacto cu famia, y Ministerio Publico tambe. Aki mas tanto posibel ta trata na informa y mantene famia na altura di e sucedido.
Landsrecherche a scucha e dos Polisnan como ‘testigo’ of como ‘sospechoso’? Aki Ministro Tjon a contesta: “Nan a wordo scucha como sospechoso.”
Tabatin camera riba e ruta di persecusion e marduga ey? Ministro a contesta cu esaki ta informacion di investigacion, y no por duna detaye. Ministro no por a bisa tampoco si e momento ey di persecusion tabatin hende den cameraroom, como cu e ta informacion di investigacion.
Ministro a confirma cu Cuerpo Policial tin un Psicologo den servicio, aunke e no ta un ‘klinisch psicholoog’. El a indica cu di hopi tempo caba, e servicio di Psicologo ta wordo ofreci na agentenan ora cu esaki ta necesario.
