PORT OF SPAIN: Varios pais den Caribe a wordo sacudi cuminzamento di e siman aki door di temblor.
Esey segun personal di Seismic Research Centre (SRC) di University of the West Indies ubica na Trinidad & Tobago.
Segun SRC, un temblor cu magnitud di 4.1º a socede Dialuna anochi 8:47 pm y ubica como 75 kilometer pabao di San Fernando, cu ta keda zuid di e capital di Trinidad & Tobago. E tabata na un profundidad di 10 km y ningun informe a drenta di daño causa pa esaki.
Diadomingo anochi tambe, SRC a registra un temblor pa 9:27 pm cu a sacudi Antigua and Barbuda, St. Kitts-Nevis, y Guadeloupe. E temblor aki tabata 10 km hundo, y a wordo sinti como 110 km panort di e capital di Antigua, esta St. John.
Diasabra marduga tambe, un temblor di 4.6º riba Scala di Richter a wordo registra riba lama net noordoost di Republica Dominicana. E epicentro tabata na un profundiad menos di 30 km, y ningun informe a drenta di daño sinti sea na Republica Dominicana of na Puerto Rico.
