Tema 2023: “Ta ora di papia”
ORANJESTAD (AAN)—Dia 30 di Maart ta wordo observa, tur aña, e trastorno di salud yama “Bipolaridad”, y Health Word Organization (WHO), ta señala cu “e personanan no ta bipolar” sino cu nan ta atravesa pa un trastorno bipolar, y no mester converti esaki den un fam, cu ta etiketa e persona y ta condicion’e negativamente, mientras cu un tratamento adecua por hiba e persona biba un bida pleno.
E Dia Mundial di e Trastorno Bipolar a wordo elegi na honor di e natalicio di Vincent Van Gogh, cu a nace e fecha aki, ken tambe a biba cu e malesa aki. E fecha aki a wordo decreta cu e finalidad di informa, deriba e stigma social y educa e comunidad tocante Bipolaridad.
Datonan di estudionan realiza ta sugeri cu ta trata di un patologia asocia tanto na factornan ambiental como genetic y na e interaccion entre e personanan.
Segun cifranan e prevalencia mundial di e trastorno bipolar ta entre 1% y 2%, y segun WHO, e ta e di seis discapacidad na mundo. “Ta wordo calcula cu e ta afecta un di cada cien persona” segun e Organizacion Mundial di Salud.
KICO TA TRASTORNO BIPOLAR?
Antiguamente, e tabata conoci como “malesa maniaco-depresivo”. E trastorno afectivo bipolar ta un malesa cu ta afecta e cerebro. Bipolaridad ta un afeccion mental cu ta afecta tanto hende homber como hende muher, y nan ta presenta cambionan di animo marca of extremo.
E periodo di sinti tristeza of depresion, por alterna cu periodonan di sinti felicidad y activo, of bira di mal beis y iritable.
Datonan di WHO ta indica cu e afeccion mental aki ta e di seis causa di discapacidad na nivel global, cu mas di 60 miyon di pashent cu ta sufri di dje den henter mundo. Ademas, e personanan cu trastorno bipolar tin un riesgo particular di desaroya otro malesanan na mes momento.
E tratamento pa e trastorno aki ta inclui uso di pharmacotherapy combina cu ayudo psicoterapeutico y intervencionnan familiar y social.
Otro aspecto importante pa tene na cuenta ta pa e medio laboral acoge nan y otorga nan e proteccion necesario, y cu nan famianan tin mas conocemento di con pa actua dilanti e episodionan di crisis.
