ORANJESTAD (AAN): Un temblor basta fuerte a keda registra Diabierna marduga, relativamente basta cerca di Aruba.
Y e ta uno di magnitud promedio tiki mas halto di loke e region ta costumbra cune, como cu aki banda semper ta sismo di 2.8 te cu 3.4 ta wordo registra.
Esun di Diabierna marduga, a start como 50 seconde despues di 3:48 am.
E epicentro a wordo localiza na 12.08º Nort y 69.65º West.
Esey ta igual cu 45 km Zuidoost di Baby Beach (Aruba). E ta un distancia igual di 57 km Zuidoost di De Palm Island (Aruba). E ta igual cu 64 km Zuidoost di Wilhelmina Park (Aruba). Fuera di esey, e ta igual cu 77 km west di Punda na Willemstad (Curaçao). E ta igual cu 41 km Oost-Zuidoost di Cabo San Roman na Pensinsula di Paraguana (Venezuela).
E tabata uno fuerte! Sismogramnan na Venezuela a calcula cu e tabatin magnitud di 3.6º riba Scala di Richter. Sismogramnan na Colombia a registra cu e ta uno di 3.7º magnitud.
Temblor di 3.6º ta wordo considera en general como ‘menor’ y ta ocasiona sacudimento liviano, pero no sa ocasiona daño. Aunke e por spierta hende fo’i soño of pone articulonan cay for di reki of cashi, toch e lo no ocasiona daño structural di un cas of edificio.
E epicentro tabata bao di lama. E tabata na un profundidad di 8.8 kilometer bao subsuelo di lama. Esaki pues ta un temblor basta superficial, y lo por a wordo sinti na varios lugar. Sinembargo como cu e ta den oranan di marduga, no ta tur hende lo por a nota e movimento.
Riba e grafico por mira e ubicacion di e temblor, y tambe por mira e Sismogram.
