Gregorio Wolff y Michiel Croes, miembronan di Seppa:
ORANJESTAD (AAN): E dos miembronan di Sindicato Seppa, esta Gregorio Wolff y Michiel Croes, a splica cu ultimo tempo ta hopi informacionnan nan a trece riba e situacion interno di e Sindicato. Aki nan ta trece un recapitulacion, esta ripiti brevemente loke nan a trece dilanti.
(1) Un deficiencia grandi di Democracia: (A) For di 2013, miembronan no a ricibi informacion y segun revistanan di Seppa no a tene eleccion pa directiva di acuerdo cu statutonan. (B) No tin directiva pa cumpli cu statutonan, articulo 19. (C) Pa controla e maneho di Comite Ehecutivo, annex Secretario General. (D) Pa controla e maneho financiero di Seppa;
Pues 12 aña sin ningun sorto di Control ariba e Comite Ehecutivo/Secretario General.
(2) No tabatin formacion di acuerdo cu informacionnan den revistanan di Seppa, for di 2015. Esaki a trece consecuencianan grandi pa Seppa: (A) E falta di un plan di formacion a haci cu Seppa no tin lidernan nobo, esta no tin e generacion di relevo pa tuma over. (B) Fayo di Secretario General di no busca candidatonan pa directiva di Seppa. (C) Secretario General ta eherce e funcion aki ya pa 25 aña y sigur kier bay 10 aña mas. (D) Seppa pa mas cu 12 aña ta luci stanca pa loke ta e lucha sindical.
E falta di un plan di formacion ta e causante cu no tin e generacion di relevo den Seppa.
(3) E codigo di bon gobernacion/administracion den sindicato, no t’ey den Seppa: (A) No tin respet pa statutonan. (B) Secretario General M. Brito ta yama eleccion sin tene cuenta cu statutonan. (C) Secretario General no ta tene cuenta cu reglanan democratico ora ta yama eleccion. (D) No ta informa miembronan prome cu ta bay tene eleccion. (E) No ta pidi miembronan pa pone nan mes como candidato pa worde eligi. (F) No ta pidi miembronan pa bay vota ariba un fecha stipula.
(4) Secretario General M. Brito falta hopi pa ta integro: (A) Pa añanan e no ta duna informacionnan via organo oficial Noticia-Seppa. (B): No ta informa miembronan kendenan ta forma parti di Comite Ehecutivo. (C) No ta informa miembronan tocante e Congreso Anual, su decisionnan, etc. (D) Pa loke ta directiva tin bruhacion total, un biaha e ta bisa cu ta busca candidato pa tene eleccion, otro biaha ta papia di directiva sin bisa kende nan ta;
(5) Secretario General M. Brito no ta apto pa e trabao sindical: (A) Un sindicalista cu ta negocia 10 aña pa firma un CAO cu Post NV., no por! (B) Un sindicalista cu na 2010 a firma un protocol pa pensioen di APFA, cu despues di 7 aña ta analisa e cambionan, toch despues di 4 aña, na 2014 ta firma un protocol nobo pa hisa Franchise=Baha e pensioen cual a perhudica hopi pensionado. (C) Secretario General M. Brito no ta informa, ni consulta cu su miembronan; (D) Secretario General no tin respet pa statutonan, ni pa veredicto di un huez.
Miembronan di Seppa, saca un conclusion pa bo mes: E recapitulacion aki ta demonstra e falta di maneho o mihor bisa e desaster cu ta existi den Seppa actualmente. Nos ta bolbe ripiti cu Seppa tin un tremendo y unico infrastructura sindical na Aruba, nos tin un Sede grandi, cu su sala di Congreso espacioso pa 75 te 100 persona, nos tin un cooperativa grandi cu e miembro por spar y hasta presta placa, te 25.000 Florin, ora ta necesario.
Ora nos analisa cu ariba tur e fayonan y acusacionnan treci den prensa, Secretario General di Seppa ta defende su mes cu un silencio, pasobra e sa cu tur info ta berdadnan crudo. Tur miembro cu ta pensa por comprende kico ta pasando. E situacion ta bira pio ora nos tuma na cuenta cu Sra Brito ta tesorero di e Cooperativa di miembronan di Seppa y ta esun mas responsabel pa preveni e ladronicia di 382.000 Florin cu a tuma lugar durante 9 luna y despues ta nenga di cumpli cu veredicto di Hues .
Si tuma na consideracion di tur loke a ser treci prome, e problema ta grandi. Hopi ta bisa cu e miembro cu ainda ta apoya Secretario General M. Brito no por pensa bon y ta apoya algo extremadamente negativo. Consecuentemente e mester tin un problema di moral.
Miembronan di Seppa apoya C.R.D.S. Comision pa Restaura Democracia den Seppa! E Comision pa Restaura Democracia den Seppa ta trahando fuertemente, Tin listanan ta pasando ront pa miembronan firma y respalda e accionnan pa trece cambio den Seppa.
Un suplica ta bay na tur miembro, ban apoya e accionnan y ban haci di Seppa un sindicato cu basenan firme di democracia cu su eleccionnan, un sindicato luchador. Un sindicato cu lidernan nobo y hoben, kendenan lo bay planta respet.
