*Hopi doño di vivienda ta desaloha huurdo pa saca mas placa di e cas
ORANJESTAD (AAN) – Un ciudadano a tuma contacto cu mesa di redaccion di Matutino DIARIO, pa trece dilanti su preocupacion, relaciona cu e prijs di vivienda pa huur, cu ta birando excesivo na Aruba, ademas cu tin poco opcion, pasobra ta masha dificil pa haya un cas of apartamento bashi, awendia.
E ciudadano a comenta cu el a bay wak un cas na Santa Cruz, bon ubica cerca di antes Well-Well, pero el a keda “babuca” cu e prijs di huur cu ta wordo pidi.
E no ta un cas nobo, pero e ta bunita y tin un bon patio, pero ta masha chikito. No ta un cas luhoso, mas bien hopi simpel, y e ta haya cu pa 1.900 florin, ta simplemente un luho cu un famia di tres hende (tata, mama y un yiu cu apenas a cuminza traha), no por paga. Logico cu nan ta sigui busca, pasobra Dios ta grandi y algo bon pa nan lo tin di haya.
Pero e sa cu tin cantidad di hende na Aruba buscando un vivienda pa huur, y nan kier haya un cas digno y na un prijs digno tambe, no un prijs abusivo, manera nan ta describi e cas menciona.
Awo a para bira cu hopi famia cu ta biba en cas na huur, ta hayando nan mes den e situacion cu e doño ta avisa nan cu e mester di e cas, pasobra tin cu drecha cierto cosnan den dje, por ehemplo e instalacion di coriente. Aunke pa ley, e huurdo mester haya tempo pa busca otro caminda, no ta asina sin esaki ta sosode, precisamente pa e prijs super halto pa huurmento. Despues ta resulta cu loke e propietario ta haci ta adapta e cas como un sorto di studio pa huur temporalmente, principalmente cu turista. Asina por saca mas probecho di e propiedad, hasta lagando atras su balor historico (diferente di e casnan aki, originalmente, tabata tin estilo colonial).
Ta supone cu pa ley, e famia cu a biba den e vivienda cu awo nan ta pidie pa desocupa, si ta pa dreche e tin e prome opcion pa bolbe drenta biba aden. Pero esaki no ta wordo respeta. Y claro, si e famia a paga 800 of 1000 florin pa añanan largo, e lo por bay paga un huur pa un prijs redobla, y logicamente lo no por tuma e cas bek, of e no ta wordo ni ofreci bek tampoco.
Pues, e ciudadano ta haya cu ta un tristeza di wak con algun hende na Aruba ta birando asina materialista, y cu pa haci mas placa, no tin empatia ni consideracion cu hende cu semper a responde bon na e pago di huur, y cu tabata feliz bibando den un cas simpel cu kizas un ke otro cos pa drecha, cu nan mes hasta a yega di haci den e transcurso di tempo cu nan tabata huurdo.
