ORANJESTAD (AAN): Un temblor cu a registra cu un magnitud di 3.1º riba Scala di Richter, a ser detecta Diahuebs mainta trempan pa 6:11 am riba lama Noordwest di isla di Aruba.
E epicentro di e temblor aki di 18 Juni 2024 a wordo localiza na 12.89º Nort y 70.53º West. Esaki ta na un distancia di 60 km Noordwest for di Faro di California na Aruba. E ta igual tambe cu 63,6 km Noordwest for di Eagle Beach na Aruba.
E biaha aki, e epicentro tabata basta profundo, pues el a wordo ubica na 77 kilometer bao di fondo di lama.
Te asina leu, ningun informe a drenta di hende cu a raporta di a sinti esaki na Aruba, y tampoco si tabatin daño.
E magnitud di 3.1º aki, ta djis un tiki mas fuerte cu esun (3.0º) cu a wordo registra Diamars atardi cu a pasa como 245 km pariba di isla di Bonaire.
Riba e mapa por mira e ubicacion di e epicentro, y abao por mira e seismogram tambe registrando e movimentonan entre 6:11:30 am y 6:13:30 am di Diahuebs mainta. Por mira cu e temblor a start net pa 6:11:43 am.
