Como meta principal pa baha gastonan di personal a habri VUT pa empleadonan publico

Prome Minister Evelyn Wever-Croes:

ORANJESTAD (AAN): E siman aki, den e Conferencia di Prensa di Gobierno di Aruba Prome Minister Evelyn Wever-Croes a elabora riba e topico di VUT y a splica e importancia di esaki.

   E asina yama “VUT” (Vrijwillig Uitdiensttreding) ta un instrumento cu Gobierno di Aruba ta aplica ora kier stimula empleadonan publico pa tuma e paso pa bay den sector priva of tuma retiro cu lo sluit aan na nan pensioen. VUT 2024 ya ta habri y por haci e peticion te dia 5 di Augustus 2024.

   Loke a pasa na 2014: E mandatario ta splica cu gastonan di personal di Gobierno tabata un reto pa hopi aña. Casualmente den e dianan aki yegando fin di juni cuminsando juli bayendo atras 10 aña, na aña 2014 ta e diannan cu e KB (Koninklijk Besluit) a worde prepara pa manda Aruba, esaki pa motibo di mal maneho financiero den tempo di Gabinete di Mike Eman. Akinan a resalta e tempo ey entre otro cu e gastonan di personal hopi halto. A base di e KB, despues Aruba a haya e LAft, e CAft y asina mes e gastonan e tempo ey no a baha.

   Gastonnan di personal a baha: Contrario por mira cu desde 2017, cu Gabinete Wever-Croes a sinta, e gastonan a cuminsa baha. Cantidad di empleadonan publico a baha di 4869 na 2017, pa 4241 na fin di 2023, indicando un rebaho considerabel. Esaki ta e rebaho netto, per saldo, pasobra tin mas persona cu a bin acerca den posicionnan “kader”, pero tambe tin mas hende cu a bay, pero per saldo por wak cu el a sigui baha.

   Tambe por mira cu e gastonan di personal a baha cu 3% desde cu Gabinete Wever-Croes a sinta te presente. Den e Jaarverslag 2023 di Ministerio di Asuntonan General por mira e grafico riba esaki y mas informacion detaya. 

   Conseho positivo CAft: Na e momento aki e gastonan di personal di Gobierno ta bou control. Aruba a haya un bon conseho di CAft recientemente riba e presupuesto Supletorio 2024, un conseho impresionante unda ta bisa cu Aruba ta cumpliendo cu e normanan y tin e gastonan di personal bao control, pero Gobierno mester garantisa cu lo sigui tene e gastonan controla.

   Esnan cu kier haya mas informacion di VUT por check e website aki:

www.bit.ly/vut2024

   Esnan cu kier lesa a relato anual con Ministerio di Wever-Croes a baha gasto, bishita e website aki:

www.bit.ly/evelyncifra

   “Esey ta un di e motibonan principal cu Gobierno a bolbe habri un VUT pasobra e rebaho di e cantidad di personal tin varios motibo, pero esun principal ta door di e VUT”, Prome Minister a indica.