E rapport STEPS no a resulta positivo pa locual ta salud di pueblo

Dahariana Evertsz, encarga cu Promocion di Salud na DVG:

Sobrepeso y obesidad ta halto 

ORANJESTAD (AAN) Dahariana Evertsz, Funcionario di Departamento di Salud Publico (DVG), encarga cu Promocion di Salud, den entrevista cu DIARIO a elabora tocante e Raport di STEPS, cual no a resulta positivo pa locual ta salud di pueblo.

   Evertsz a duna di conoce cu aworaki nan a caba di publica e rapport via e website di DVG, y e personanan por wak tur e resultadonan y tambe e preguntanan cu a wordo haci.

   El a subraya cu den e parti di obesidad  a mustra cu 79% di e personanan entrevista, como e poblacion,  79 persona  di nan ta sufri di sobrepeso of obesidad. Di e 79 persona aki 46% di dje ta sufri di obesidad, y esey kiermen cu e parti di comemento (nutricion) ta algo cu no ta funcionando actualmente.

“Esey kiermen tambe cu nos trabao tin cu enfoca mas riba e parti di educacion tocante e nutricion di un persona mester ta, y door cu e edad di hende cu a wordo entrevista cu e encuesta aki tabata entre 18 cu 69 aña, ta nifica cu aunke bo ta di edad grandi, toch tin cosnan cu bo mester bay siña”, Evertsz a señala.

   E otro cifranan cu por a wak den e parti di inactividad, pues e parti di actividad fisico tabata bon; pues, hendenan ta moviendo na pia di trabao, pa nan mes den oranan personal, nan ta cana, nan ta bay gym. “Dus, esey  no tabata un cifra malo, pero toch ta pone nos puntra nos mes di con tin tanto obesidad y sobrepeso. Esey kiermen cu e parti di comemento ta uno cu no ta bayendo bon”, Dahariana Evertsz a bisa. Seguidamente el a referi na e situacion alarmante di consumo di alcohol y vaping na Aruba.