Awe ta celebra Dia Internacional di Lenga Materno
ORANJESTAD (AAN) – Manera ta conoci, awe dialuna 21 di Februari ta Dia Internacional di Lenga Materno, cual tema pa 2022 ta: “Uso di tecnologia pa un aprendizahe multilingual: desafio y oportunidadnan”.
Cu e tema tin e meta di debati e papel potencial cu e tecnologia ta hunga pa avanza den enseñanza y educacion, y e obhetivo di e fecha aki ta preserva y proteha tur idioma y dialecto cu ta wordo papia den henter mundo.
“E tema mes ta haci referencia na e papel importante di e tecnologia den e educacion multilingual”, segun UNESCO ta observa. E aña aki, kiermen awe, cuminzando 11’or UNESCO lo ofrece un seminario online tocante e tema.
For di ki tempo e dia aki ta wordo celebra?
Desde aña 2007, e Asamblea General di Nacionnan Uni (ONU), a proclama e dia 21 di Februari como Dia Internacional di Lenga Materno. Pero UNESCO, a proclama e Dia Internacional di Lenga Materno durante su conferencia general na November 1999. Sinembargo, te aña 2000 su celebracion a keda oficializa.
Pero, kico por compronde como “Lenga Materno?” Ta wordo compronde como Lenga Materno, e prome idioma cu un persona ta adkiri ora e nace y cu despues ta forma parti di su bida, como un instrument di comunicacion, cu tambe ta conoci cu e nomber di “Lenga Nativo”. E lenga(nan) cu ta wordo siña despues, den e transcurso di bida, ta ser considera como di dos lenga(nan).
Por ehemplo, awendia cu mayoria di pais di habla hispano, ta promove y fomenta e enseñanza di Idioma Ingles, ta dificil pa un hoben cu ta caba scol por haya trabao si no ta bilingual Spaño-Ingles, y mucho menos ora di caba un carera universitario.
Pesey e ta forma parti di e programanan escolar y academico, na un forma hopi profundo y importante, y no manera antes. Y Aruba, orguyosamente, ta un pais chikito pero unda mayoria di ciudadano ta multilingual unda cu e lenga materno ta Papiamento, y banda di dje Hulandes ta Idioma oficial di enseñanza, y como materianan ta bin Spaño y Frances. Esaki ta algo cu hopi bishitante di afo cu ta bin Aruba, ta keda masha sorprendi y admira di dje.
Y pakico e Dia Internacional di Lenga Materno ta wordo celebra?
E dia aki ta wordo conmemora pa rindi tributo na e pueblo Bangladesh, ya cu na aña 1952, ora cu su habitantenan tabata riba caya celebrando e Dia di e Movemento di e Lenga Bengali, nan a wordo ataca door di e ehercito di Pakistan. Hopi di e nativonan a wordo mata pero, no obstante, nan a para firme y a defende un derecho universal manera expresa den e lenga natal, ta.
Dos punto cardinal den cual ta wordo enfoca durante e Dia Internacional di Lenga Materno, y cu a haya enfasis na aña 2021 ta:
Bolbe pensa riba e politica y practicanan inclusivo den enseñanza y e siñamento den conextonan multilingual.
Mehora e inclusion atravez di multilinguismo, incluyendo e lenguahe di signo, den atencion na e educacion di e prome infancia, cu ta e base di e siñamento.
