Despues di caso serio cu arma di candela
ORANJESTAD (AAN): Hopi hende a keda sorprendi y tambe spanta pa loke a socede Diahuebs na e scol SPO Brazil, caminda un alumno a bay cu un arma di candela na scol, y despues di esey ora cu nan a wordo gara, nan ta bin actua comedia comosifuera nan no sa di nada.
E reaccion den pueblo tabata uno fuerte, unda hendenan ta pensa mesora riba e cantidad di tiramento cu morto cu a socede rond mundo na scolnan.
Ta parce cu unico hendenan na Aruba cu “NO” ta considera esaki como algo serio, ta cierto miembro di Dienst Publieke Scholen (DPS) na Aruba.
Ta parce cu DPS simplemente no ta considera esaki nada grave. Esey ta loke Sindicato SIMAR a trece dilanti, pasobra e docentenan di SPO Brazil ta sinti cu nan no ta sinti nan mes safe mas na e scol.
Diahuebs siman pasa, Polis a detene algun alumno di e scol aki cu ta envolvi den e asunto di arma di candela aki cu a wordo treci scol. E alumnonan a kere cu Polisnan ta kens ora cu nan a conta cierto storia, pero agentenan a detene nan toch. Un arma di candela a wordo confisca tambe.
E alumnonan aki no ta pensa cuanto problema nan a hinca nan curpa aden, caminda nan nomber pa semper ta wordo mancha y nan papel di “Bon Conducta” ta bira nada bunita.
Diabierna mainta, despues cu e docentenan a ripara cu Departamento di DPS no ta parce di tin interes mes den loke a pasa na SPO Brazil, a dicidi pa expresa nan disgusto y a dicidi na tene un walk-out. Mesora a pone nan Sindicato SIMAR na altura, y mesora e president Josephine Albertus a presenta.
E docentenan tin un mensahe simple pa DPS: Nan kier Security na scol. Esey ta lo mas importante.
Docentenan a keda sorprendi cu DPS no a haci nada pa ni bay na e scol pa check kico ta pasando. Esaki a pone cu nan ta sinti comosifuera cu DPS ta menosprecia nan te na lo maximo. Ta comosifuera DPS ta pensa cu cabezante y personal di SPO Brazil tin di traha riba “auto-pilot” y riba su mes e situacion lo drecha.
Despues cu DPS a haya tende cu e docentenan a tene un Walk-Out, e ora porfin nan a dicidi na sali di nan oficina cu airco pa bay SPO Brazil pa check kico ta pasando.
