Kimberly de Cuba:
ORANJESTAD (AAN) – Fundacion Telefon pa Hubentud a yama un conferencia di prensa, den cual a participa Kimberly de Cuba, James Sneek y Barbara Brown di Aeropuerto Internacional Reina Beatrix.
Kimberly de Cuba a duna di conoce cu FTPH, a cuminza cu training basico pa Mentornan.
“E personanan cu ta yuda e hobennan pa medio di telefon, email y chat, tur dia di 2’or pa 6’or di atardi, ta mentornan cu ta haci esaki boluntariamente.
Prome cu un persona bira mentor pa nos mucha y hobennan, mester ricibi un training. Tur aña FTPH, durante e luna di April, ta busca personanan pa bira mentor cerca nos. Despues cu e personanan solicita, y wordo entrevista, nan ta sigui e training basico aki, den Luna di Mei”, Kimberly a informa.
Durante e training basico e participantenan ta ricibi 25 module. Algun di e modulennan ta encera, por ehemplo, e siguiente temanan:
Modelo di combersacion, Tecnica di Combersacion, Formacion di Gang, Depresion, Luto, Sexualidad, Amistad, Droga, Alcohol, entre otronan.
“Despues di e training basico, nan ta cumpli cu un pasantia di seis ora. Despues di e trayecto aki, e persona ta bira un Mentor y ta cla pa duna ayudo na nos mucha y hobennan”, de Cuba a splica.
El a agrega cu e aña aki lo no ta diferente. Fundacion Telefon pa Hubentud ta buscando personanan (boluntario) pa start cu e training basico pa Mentor.
E Mentor ta duna informacion, opcion y sosten emocional na mucha y/of hobennan local via telefon, email of chat.
“Nan ta pa preveni, reduci of stop cualkier problema, of aclarea cualkier pregunta cu e mucha of hobennan tin pa cu nan mes of pa cu nan ambiente. E mentor mester por duna via telefon of internet, ayudo, informacion y conseho na hobennan, minimo dos ora pa siman. E mester tin dominio di Papiamento, Ingles, Hulandes y Spaño”, Kimberly de Cuba a indica.
El a agrega cu e persona mester ta entusiasma y disponible. Tur persona desde su 16 aña di edad, por solicita pa bira Mentor. FTPH ta ofrece tur aña, minimo dos training grandi, ambiente placentero y di siñamento, de Cuba a splica.
Pa mas informacion por comunica cu TFPH via social media y facebook, email y telefon.
