Accionnan di Union Europeo y Nacionnan Uni ta crea aliento nobo --- *Expulsion di Rusia di Comision Derechonan Humano ta acto concreto --- *Organisacion Mundial di Salud cu plan di emergencia pa Guera Nuclear
ORANJESTAD (AAN) — Na 1945 Nacionnan Uni a mira luz como organisacion cu mester a evita cu mundo lo a conoce un holocausto atrobe.
E motibo di nacemento di Nacionnan Uni no tabata pa crea un lugar pa paisnan topa y papia palabranan bunita pero pa mundo a crea un foro cu lo a sostene na prome lugar e dignidad di hende y tur aspecto cu ta nace for di e realidad aki.
Ayera porfin mundo a cuminsa mira cu un dia mundo a opta, pa na New York mundo reuni pa atende cu loke tin prioridad na mundo cu ta bienestar di hende pa medio di tur loke ta mishi directamente cu e bienestar di hende.
Ora mira atras riba e simannan cu a pasa for di momento cu Rusia a dicidi di invadi Ukraine, ta mira con mundo mester a atende cu un cantidad di asunto cu na diferente ocasion, DIARIO a presenta como fayonan grandi den e defensa di loke realmente derecho humano ta representa.
Manera for di inicio di e Conflicto di Ukraine DIARIO a trece dilanti, mundo a permiti desaroyonan cu ta mishi cu conviccionnan cu mundo a pretende cu e tin y mundo a bandona su firmesa enfrente realidadnan cu ta existi na entre otro Rusia.
E relacionnan economico mundial tabata loke nos a presenta for di prome momento como contradiccion cu e posicion politico enfrente Rusia.
Ayera na Merca porfin e posicion firme di DIARIO a bini dilanti, ora oficialmente gobernante di Merca a mustra, cu e “Age of Engagement” cu Rusia a termina.
Porfin mundo a dicidi di papia palabra cla cu Rusia manera a bira conoci ora informacion a nace den seno di Nacionnan Uni, cu Rusia no por forma parti mas di e Conseho di Derechonan Humano.
E decision aki a duna aliento na e pensamento, cu tin speransa pa cambio na mundo y cu e generacionnan nobo lo tin e curashi y firmesa necesario pa realmente lucha pa dignidad humano y pa bienestar di e ser humano.
Na varios ocasion, nos mester puntra nos mes unda e ser humano a keda den accionnan di Nacionnan Uni, manera por ehempel a pasa na Venezuela caminda te awe hende ta sufri na man di un dictador Nicolas Maduro, cu a haci cu Miyones di Venezolano mester a bandona nan pais pa bay biba como ciudadano di segundo rango na otro lugar na mundo.
Nos no por keda ciego enfrente realidadnan cu a haci nan mes visibel na Aruba y otro islanan Hulandes, cu a base di nan nivel di bida, a bira lugar di asilo pa hende cu mester a bandona nan pais pa motibo di dictadura.
E decision pa expulsa Rusia di e comision, e Conseho pa Derechonan Humano, ta duna prueba cu Nacionnan Uni por bira un foro realmente democratico pa sirbi e ser humano persigui dor di hende hambra pa poder, manera ta e caso cu Vladimir Putin y tanto siguidornan cu e tin hasta den nos region.
Ayera Organisacion Mundial di Salud a cuminsa traha riba un plan di emergencia cu mester drenta den accion si realimente mundo wordo confronta cu un crisis nuclear.
Mundo por a spera cu Rusia lo a bini cu e menasa aki, despues di e horor cu a bira realidad na e pais.
Awor mundo ta duna prueba na Rusia y otro despotanan cu mundo ta prepara pa esaki tambe y cu mundo ta corta ala di dictadornan cu no respeta dignidad di hende.
Ayera economia di Rusia tabata sigui basha abou. Europa a scrap negoshi di carbon, azeta y gas cu ta nifica 4.35 Biyon menos pa Vladimir Putin.
Medidanan maritimo a wordo tuma y porfin mundo ta actua, manera for di prome momento e mester a actua.
E crisis ta culmina si tene cuenta cu tur e accionnan cu mundo porfin ta tuma. Accionnan cu ta reemplasa e terorismo cu Vladimir Putin a aplica contra henter mundo for di momento cu el a dicidi cu e ta invadi Ukraine, a duna inicio na matansa di inocentenan y a pone un mundo gasta fortuna na armamento na e momento cu mester a gasta placa na recuperacion mundial di Covid-19.
E crisis di Ukraine ta alcansa un momento nobo y decisivo na un mundo cu porfin ta duna prueba cu dignidad di hende ta central na mundo.
