A dura casi 5 aña promer cu a trata e caso den Corte
ORANJESTAD (AAN): Aunke cu e homber Colombiano M. biba na Aruba ta para riba cu e no a mishi cu e mucha P., Fiscal ta haya M. culpabel y a exigi castigo combina. Hues despues di a scucha defensa di abogado, a sera tratamento di e caso y a dicta sentencia di biaha.
Hues ta haya M. culpabel y a confirma e exigencia di Fiscal. Hues ta haya cu mirando cu casi 5 aña a pasa promer cu e caso ta worde trata den Corte, Fiscal a tene debido cuenta cu esaki y pesey ta confirma e castigo cu Fiscal a exigi.
Acusacion: E acusacion cu Fiscal a presenta den Corte contra M. ta cu riba 6 Mei 2017, M. a abusa sexual di mucha P.(6). Subsidiario, Fiscal a acusa M. di a haci actonan inmoral cu e mucha P., door di mishi cu su parti intimo.
Den Corte, M. a desmenti di a mishi cu e mucha P.
Caso a dura casi 5 aña: Hues a remarca cu e caso ta di casi 5 aña pasa. El a bisa cu segun e raport di KZP, e mama di P. a declara cu ariba 6 Mei 2017, e hunto cu su yiu muher P., cu su amiga L. cu su yiunan y cu su amigo M. a bay laman.
E mama y L. a sinta dilanti mientras cu e tres muchanan y M. a sinta patras. M. y P. ta amigo di otro. P. a bay sinta den scochi di M. Despues di laman nan a dicidi di bay come na cas y nan a dicidi di pasa supermercado pa haci compras.
Ora a yega supermercado, P. a bisa su mama cu e kier bay cu ne. E mama a bis’e pa warda den auto. E mama y L. a baha y un rato despues nan a bolbe. L. a ripara cu P. su wowonan tabata na awa. El a pensa cu esey ta door cu e mama a nenga P. pa bay cu ne.
Mishi cu mucha: Nan a bay un otro supermercado y ora e mama kier a baha P. a bolbe pidi pa baha cu su mama. E mama a ripara cu P. ta actua straño y a lag’e baha. Den supermercado P. a cuminsa yora y ora e mama a puntra kico a pasa, el a bisa cu M. a hinca su man den su short y mishi na su parti intimo.
E mama a consola su yiu y despues a bay auto y reclama M. kico su yiu P. a bisa. Mientrastanto L. a bay auto tambe y a saca su dos yiunan for di auto.
- a desmenti pero e mama a bisa cu e ta kere su yiu y a bisa cu e lo haci denuncia. E mama a bisa cu M. tabata bay bon cu P. Nan tabata amigo di otro. E tabata confia M.
Hues a mustra cu na KZP, P. a bisa cu ora e tabata sinta riba scochi di M., M. tabata kier pa e habri su pianan pero e no tabata kier. M. a habri su pianan y a hinca man den su short y a mishi cu su parti intimo. Segun P. ora M. a mishi cu ne den auto, el a bisa P. pa no bisa nada. Segun P. el a bisa M. pa stop pero M. a sigui. Segun P., 10 biaha M. a mishi cu su parti intimo.
Durante tratamento di e caso a sali na cla cu desde 2015, M. ta bibando na Aruba y ta trahando. Pa e caso aki M. no a worde encarcela.
Investigacion dificil: Fiscal a bisa Hues cu casonan di inmoralidad ta casonan hopi fastioso. No pasobra cu hopi biaha no tin testigo sino cu ora ta trata di mucha ta dificil pa haci preguntanan riba hechonan sexual.
E mucha no sa kico e ta. Esey ta haci investigacion dificil.
Mester tin prueba di sosten: Fiscal a sigui bisa cu den casonan asina ta busca prueba di sosten. Den e caso aki tin testigonan cu ta mustra cu algo a sosode cu P. cu na dado momento e tabata yora y tembla. Algo lo mester a pasa den auto. E pregunta ta si tin suficiente prueba di sosten.
Na opinion di Fiscal, e declaracion di P. ta cuadra cu e declaracion di su mama y e amiga L. cu tabata den auto. Fiscal a bisa cu e ta kere e declaracion di P. E mama y su amiga L. a mustra cu P. tabata yora y tabata tembla. E hecho cu P. ta bisa cu M. tabata mishi na su parti intimo, Fiscal ta haya M. culpable di acto inmoral y no abuso sexual.
Castigo combina: Fiscal ta haya cu M. a abusa di e amistad y confianza cu e mucha y mama tabatin den dje. Pa cu e castigo, Fiscal a bisa Hues cu e ta tene cuenta cu e delito aki a sosode na 2017 y ta casi 5 aña a pasa.
El a bisa cu en principio ta duna castigo di prison pa inmoralidad pero mirando e tempo cu a pasa el a exigi 5 luna di prison condicional y un tempo di prueba di 2 aña. Tambe Fiscal a exigi 150 ora di trabao pa comunidad y su M. no cumpli e lo mester bay 75 dia sera den prison. Por a mira cu M. tabata saco di cabez mustrando cu e no ta di acuerdo.
Abogado: mr. Griffith a bisa cu tin declaracion di e mucha contra e sospechoso M. El a remarca cu casi 5 aña pasa promer cu e caso worde trata den Corte. El a bisa Hues cu M. mes a bay Polis y a duna declaracion promer cu e mama di P. a haci denuncia.
Notabel ta cu e declaracion di M. no ta den e documentonan. E abogado a sigui bisa cu despues di 2 aña, na 2019, M. a worde deteni pa interogacion y despues laga liber. Despues di 2 aña y 6 luna, M. ta worde persigui.
A sobrepasa tempo pa trata e caso: Mr. Griffith a bisa Hues cu e ta haya cu a sobrepasa e periodo di proceso di Corte. E abogado ta haya cu Fiscal a neglesha di cuminsa un caso. El a remarca cu durante 2 aña, despues di e keho, ningun investigacion a tuma lugar. Ta casi 5 aña a pasa y e reduccion di castigo cu Fiscal a haci, no ta hustifica e tardanza asina hopi.
E abogado ta haya cu mester declaracion Fiscal no admisibel den e caso y laga M. liber. El a mustra cu door di tardanza, M. no por a busca testigo pa scucha. El mustra cu M. a fractura su man e tempo ey y a caba saca su man for di gips. Ta imposibel cu e tabata mishi cu P.
Na opinion di mr. Griffith, pa habri pia di e mucha, M. mester di su dos mannan y esey no tabata posibel. E ta kere cu door cu P. lo tabata move riba scochi di M. y M. a bay tene cu su man robez pa P. no cay, accidental su man a mishi cu e parti intimo di P. El a cuestiona e forma con interogacion di e mucha P. a tuma lugar.
No tin video di e interogacion aki, cual ta un exigencia. Awor mester bay solamente loke tin para riba papel. E abogado ta kere cu door di preguntanan di e mama, P. tabata bisa cosnan. E ta haya cu tin duda kico realmente a pasa y pesey e ta pidi Hues pa declara M. liber.
Fiscal a reacciona: Fiscal a reacciona cu Corte Supremo a dicidi cu ora un caso sobrepasa tempo no por declara Fiscal no admisibel. Ta un hecho cu a tarda cu e caso aki y pesey a bin cu e exigencia di castigo combina.
Fiscal a bisa cu e no tin duda den e forma con e interogacion a tuma lugar. Fiscal ta haya cu tin suficiente prueba di sosten.
Sentencia: Hues a sera tratamento di e caso y a dicta sentencia di biaha. Hues a bisa cu e no tin ningun motibo pa declara Fiscal no admisibel. Pa cu e caso mes, no tin ningun motibo pa duda den declaracion di e mucha P. Hues a remarca, ki motibo P. lo tin pa bay gaña riba su amigo M.
Hues a bisa cu cada vez cu e mucha conta kico a pasa el a yora. Hasta na KZP el a yora. Hues ta haya cu tin suficiente prueba di sosten. El a conclui cu M. a haci actonan inmoral cu P. manera Fiscal a bisa. Door cu hopi tempo a pasa, Fiscal no a pidi pa M. bay sera.
Hues a confirma e exigencia di Fiscal. Hues a condena M. na 5 luna di prison condicional y un tempo di prueba di 2 aña. Tambe 150 ora di trabao pa comunidad y su M. no cumpli e lo mester bay 75 dia sera den prison.
