Telefon pa Hubentud awor ta presentando ‘Chic Chat’

“Tin ora mayornan no kier echt tende kico nos tin di bisa”

ORANJESTAD (AAN): Riba 20 di November mundo henter ta celebra e dia di Derecho di Mucha. Ariba 20 di November 1989 e tratado di Derecho di Mucha a ser adopta pa Nacionan Uni. Y ariba 20 di november 1999 tabata e dia cu prome biaha un mucha a tuma contacto via e number di telefon 131 cu Telefon pa Hubentud.

  Den cuadro di esaki Fundacion Telefon pa Hubentud Aruba a celebra dia nacional y International di Derecho di Mucha y su 22 aniversario.  

   Pa 22 aña caba Fundacion Telefon pa Hubentud Aruba ta presenta ariba e dia aki un proyecto pa e aña benidero. E aña aki no lo ta otro. Un otro proyecto cu Fundacion Telefon pa Hubentud Aruba a presenta ta Chic Chat. Den cuadro di cooperacion Fundacion Telefon pa Hubentud Aruba a acerca Centro di Desaroyo di Hende Muher pa ta parti di e proyecto aki.

   Hunto cu otro telefon pa mucha y hoben Internacional nos ta mira cu e damanan ta esnan cu mas hopi ta tuma contacto cu pregunta, of pa ayudo y conseho. Entre 14 pa 17 aña bo ta encontra retonan. Basa ariba e decicionan cu bo ta tuma, bo lo por ta feliz y liber. Door di bon informacion tocante e temanan cu actualmente ta un reto pa e hobennan, e hobennan por tuma mihor decisionnan den bida. Chic Chat a ser desaroya pa informa damanan hoben cu informacion corecto.

   Seis dama hoben entre 14 y 17 aña a participa na Chic Chat. Algun tema cu a ser trata durante Chic Chat ta por ehempel: relacion, date, droga, amor propio, media social, relaion cu mayor etc. Chic Chat a ser graba y lo ser transmiti via media y media social pa preventivamente intenta di reduci desaroyonan negativo bao nos damanan hoben.

    Otro organizacionan cu a participa na Chic Chat cu nan experticio ta Famia Planea y FADA. Na momento cu e damanan participando na Chic Chat tabatin pregunta tocante droga/ adiccion of sexualidad, e profesional representando e organizacion a suministra informacion corecto tocante e tema. 

  Pa mas informacion tocante Chic Chat por tuma contacto cu Fundacion Telefon pa Hubentud Aruba via nos website: 131.aw, Instagram: 131aruba