ORANJESTAD (AAN): Diadomingo dia 28 di november 2020 lo tuma lugar e di dos edicion di Kiwanis Ride4Kids Challenge.
E actividad aki ta un iniciativa di Kiwanis Club of Palm Beach Aruba pa recauda fondo pa duna aporte na nos communidad, especialmente na muchanan den necesidad.
Segun Rothmar Coenraad, presidente di Kiwanis Club of Palm Beach, e pandemia di COVID-19 ainda ta afectando comunidad di Aruba. Y desde aña 2020 mayoria organizacionan boluntario na Aruba, incluyendo Kiwanis Palm Beach, mester a reinventa nan mes pa asina por sigui funciona y cumpli cu nan metanan proponi. Nan a bin cu ideanan nobo pa recauda fondo pa asina e club por conta cu e medionan necesario pa sigui contribui na e comunidad pa medio di su proyectonan social, cu den gran parti ta enfoca ariba e bienestar di nos muchanan.
Kiwanis Ride4Kids Challenge ta ensera un actividad di ciclismo unda 12 miembro di e Club a acepta e hazaña pa pasa rond henter Aruba cu bicicleta dos biaha, asina recaudando fondo pa cada kilometer completa of cu donacion fiho.
E evento lo cuminda 3’or di diadomingo madruga, cu e 12 miembro saliendo for di Club di Kiwanis na Neptali Henriquez Park y lo termina pa 10:30.
Coenraad a indica cu riba nan medionan social, esnan cu kier yuda cu donacionnan por sigui e instruccionnan pa haci un donacion na e causa. Por tuma contacto cu e miembronan tambe. E meta ta pa yega na un suma grandi pa asina cubri schoolgeld di 200 mucha cu ta bin na remarca.
Tambe presente den e conferencia di prensa tabata director di SKOA, señora Anoushka Baly, kende a enfatiza cu nan ta hopi gradecido na Kiwanis Club of Palm Beach pa haya nan yudanza pa alumnonan cu mayornan di un of otro manera no por cumpli cu rekisito di pago di aña escolar. Tin por lo menos 700 mucha cu ta na areglo di pago.
SKOA a landa un fondo social y esaki ta den desaroyo ainda. Nan a acerca diferente instancia aña pasa pa yuda cubri e gastonan di alumnonan. Pa loke ta trata e aña escolar aki, nan a wordo acerca door di Kiwanis Club of Palm Beach pa por sostene e alumnonan di menos recurso y asina e aña escolar aki, mayornan por tin un peso menos riba nan cabes.
