TEDxOranjestad tin un evento ‘Countdown’ prepara pa aki dos siman

Evento organiza pa Directie Natuur & Milieu y Elever

ORANJESTAD (AAN): Diabierna mainta DIARIO tabata presente na Hofi Shon Shoco na Parke Arikok, caminda Directie Natuur en Milieu hunto cu Élever Strategy & Solutions a convoca un conferencia di prensa.

   Esaki tabata pa elabora riba un evento cu nan ta yama ‘Countdown’ den e serienan di TEDx y cu lo tuma lugar Diasabra 30 di October venidero atardi den e bahada di solo despues di 5’or di atardi.

   Director di Directie DNM, esta drs. Gisbert Boekhoudt, a bisa cu e tema principal lo bay ta ‘Cambio di Clima’ y loke a wordo haci caba y kico lo por haci.  Esaki Directie Milieu ta haci riba Diasabra, algun dia prome cu e conferencia mundial cu ta toca e topico di cambio di clima.

   Departamento di Maneho, Directie Natuur en Milieu ta concipia maneho y ta sigui riba e rumbo aki pa fortifica y traha maneho cu por adresa e mitigacion y adaptacion di efectonan di cambio di clima.

   Julisa Arends-Hoevertsz di Élever Strategy & Solutions a splica di e idea tras di TEDx y tambe e Countdown, y su rol den esaki.  Awendia TED a bira amplio cu djis un conferencia.  Awor ta mishi cu tur topico cu bo por pensa.

   TED ta otorga licencia y organiza un conferencia local, y esey ta loke Julisa Arends-Hoevertsz a haci na 2014 caba, y despues a organiza diferente conferencia di TEDx.

   Awor ta na turno pa organiza un TEDx Oranjetsad Countdown.  E unico meta ta pa acelera idea y accionnan pa mehora clima.  Cu e conferencia aki lo por trece accion dilanti, pa asina yuda den e area.  Ora cu Directie Natuur en Milieu a acerca Arends-Hoevertsz pa organiza un conferencia den e topico aki, el a bin manera universo a alinea perfectamente.  Pasobra net aña pasa na October, TED a lanza e idea aki di ‘Countdown’ den un conferencia virtual.

   E conferencia di Countdown na Aruba, lo presenta ideanan local.  Pues persona- y companianan cu ya caba ta tumando accion pa mehora medio ambiente y traha riba e problema climatologico.  TED su lema ta ‘Ideas worth spreading’, y cu Countdown esaki no ta idea mas, sino con pa tuma accion.

   Durante e evento aki lo tin 8 oradornan local; cu ta enfoca riba solucionnan local tocante cambio di clima. Ademas di e oradornan local lo tin streaming di e oradornan internacional y hunto cu un grupo stakeholders lo traha den grupo riba un plan strategico di implementacion di e ideanan presenta.

   Countdown ta un iniciativa global organiza pa TED y Future Stewards, pa acelera solucionnan concreto pa e crisis climatologico, transformando ideanan den accion. E obhetivo ta pa crea un miho futuro reduciendo mundialmente e emision di gas na mita pa 2030 y pa yega na net-zero pa 2050. E iniciativa aki ta continua den un cumbre cu ta tumando luga den e luna aki na Edinburg, Scotland caminda mas cu 100 lider di rond mundo lo reuni pa comparti un plan concreto pa un futuro mas saludabel pa nos tur.

   Cada oradornan local lo presenta accionnan concreto cu cada un di nan ya caba ta implementando den nan bida of den nan respectivo companianan. Den nan area di experticio nan ta trata di reduci emision di gas y mehora e medio ambiente. E oradornan di e atardi lo ta Sra Anne Witsenburg, Nichole Danser, Christie Mettes, Gregory FunAFat, Robert-Jan Moons, Elthon Lampe, Chelsy Arilee Arends, Centrale Bank van Aruba.

   Countdown lo worde transminti riba e pagina di Youtube y Facebook di TEDxOranjestad, riba e pagina di Facebook di Directie Natuur en Milieu y via Telearuba.

   Mehoramento di nos medio ambiente y cambio drastico climatologico ta rekeri accion colectivo di nos tur. Cada un di nos por yuda den e proceso. Cada accion maske ta chikito, ta haci un diferencia.