Minister Ursell Arends: - ORANJESTAD(AAN): Diabierna mainta minister di Naturaleza Ursell Arends tabata presente na Santa Rosa pa lanzamento di un app crea pa Code 19, pa acumula informacion den sector di agricultura cu despues lo wordo amplia.
“Nos ministerio sigur ta bay fungi como e facilitador pa duna e sector di agricultura, cria y pesca (sector primario) e hermentnan necesario pa desaroya e sector aki den uno economico pa nos isla y awe nos ta wak cu via tecnologia Santa Rosa ta cuminza facilita esaki tambe, pa nos por tuma decisionnan y crea datonan pa yuda guia e proceso di con Gobierno tambe por facilita tur cos”.
Esaki segun Arends, kende a sigui bisa cu e web portal aki ta yuda Gobierno tuma decisionnan basa riba evidencia y data.
“Esaki sigur lo duna un empuhe tanto na agricultornan cu ta cultiva usando tecnologia y tambe esnan cu ta cultiva den e sistema tradicional”.
E herment aki lo yuda nan organiza nan mes mihor, yuda Santa Rosa y guia e proceso pa asina den futuro agricultura por ta mas organiza na un manera profesional, segun e mandatario.
El a duna un pabien na desaroyadornan di e app y tur agricultor, mirando cu segun e, esaki ta muestra cu e compromiso tey pa yuda desaroya e industria aki.
“Hunto cu Santa Rosa y tur otro servicio cu tin cu duna nan apoyo, nos lo crea un sector economico for di sector primario”, segun Arends.
