Prome Evelyn Wever-Croes y Futura ta informa:
ORANJESTAD (AAN): Despues di esfuersonan extensivo y trabaonan haci door di e cuerpo di Maestro-/Maestranan na Colegio Sagrado Curason, a keda confirma cu dentro di poco lo tin un Tech Lab nobo na Colegio Sagrado Curason!
E meta di e Tech Lab aki ta stimula innovacion, creatividad, exploracion, den e studiante y alavez maestronan. Pa yega na e Tech Lab aki, den e fase inicial lo converti un espacio actual den un Lab cu colornan vibrante, ekipa cu diferente tecnologia, ‘gadgets’, Virtual Reality (VR) equipment, y mucho mas.
Colegio Sagrado Curason, cu a haci tur e trabaonan preparatorio hunto cu Aruba Futura Foundation, cu ta colaborando den e iniciativa aki, ta cla pa ekipa y lansa e Lab aki den e lunanan venidero den su prome fase. Trabaonan ta andando caba pa converti e espacio aki, y den esaki kier a gradici y alavez aplaudi e cuerpo di maestro/maestranan cu den nan tempo liber ta trahando y literalmente construyendo esaki.
Gobierno di Aruba, Colegio Sagrado Curason, y Aruba Futura Foundation kier a haci un yamado tambe na comunidad en general, comercio, y cualkier persona of instancia cu kier contribui na engrandece e Tech Lab aki den proximo fase, pa contact libremente: This email address is being protected from spambots. You need JavaScript enabled to view it. , This email address is being protected from spambots. You need JavaScript enabled to view it. , of This email address is being protected from spambots. You need JavaScript enabled to view it. pa cualkier informacion.
Idealmente, den un proximo fase, lo sigui ekipa e Tech Lab haciendo esaki uno mas grandi y habri pa otro scolnan, unda cu maestronan tambe por bishita y explora un ambiente diferente unda cu innovacion y exploracion ta central den e actividadnan.
Un biaha mas palabranan di elogio na e cuerpo di maestro-/maestranan di Colegio Sagrado Curason, y muy en especialmente Ruzischka Tromp y Nadia Maduro, cu a haci esaki un realidad atraves di nan esfuersonan, perseverancia, y vision. Keda pendiente pa mas informacion, y tambe e prome imagennan di e Tech Lab aki!
